Ombudsmanların Bakı Sammitində süni intellektin əmək bazarına və məşğulluğa təsiri müzakirə olunub
Bakı, 18 iyun, AZƏRTAC
Ombudsmanların Beynəlxalq Bakı Sammiti çərçivəsində “Süni intellektin əmək bazarına və məşğulluğa təsiri” mövzusunda panel sessiya təşkil olunub.
AZƏRTAC xəbər verir ki, sessiyaya Diplomatiya və beynəlxalq əlaqələr üzrə Cenevrə məktəbinin Məsləhət Şurasının üzvü Katerin Fiankan Bokonqa moderatorluq edib.
Paneldə Türkiyə Respublikasının İnsan Hüquqları və Bərabərlik Qurumunun sədri Vasip Şahin, Macarıstanın Fundamental hüquqlar üzrə müvəkkili İmre Juhasz, Monteneqronun İnsan Hüquqları və Azadlıqlarının Müdafiəçisi (Ombudsman) Sinişa Bjekoviç, Azərbaycan Respublikası İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinin icraçı direktoru Fariz Cəfərov, eləcə də Əmək və Əhalinin Sosial Müdafiəsi Nazirliyinin Əmək Bazarı və Sosial Müdafiə Məsələləri üzrə Milli Observatoriyasının İdarə Heyəti sədrinin müavini Elçin Süleymanov çıxış ediblər.
Müzakirələr zamanı süni intellektin əmək bazarına təsiri, yeni məşğulluq imkanlarının yaranması, əmək münasibətlərində rəqəmsal transformasiya və işçi hüquqlarının qorunması məsələləri diqqət mərkəzində olub.
Qeyd edilib ki, süni intellekt artıq həyatın demək olar ki, bütün sahələrinə nüfuz edib və əmək bazarında da mühüm dəyişikliklər yaradır. Bu texnologiya məhsuldarlığın artırılması, iş proseslərinin optimallaşdırılması və qərarların daha operativ qəbul edilməsi baxımından geniş imkanlar açır.
Panel iştirakçıları vurğulayıblar ki, süni intellekt əmək təhlükəsizliyinin gücləndirilməsinə də töhfə verə bilər. Xüsusilə təhlükəli iş şəraitində risklərin vaxtında müəyyən olunması və qarşısının alınması üçün bu texnologiyaların tətbiqi mühüm əhəmiyyət daşıyır.
Bununla yanaşı, süni intellektin tətbiqinin müəyyən risklər yaratdığı da qeyd olunub. Bildirilib ki, təhsil və rəqəmsal bacarıqlara çıxış imkanları fərqli olan insanlar arasında bərabərsizliyin dərinləşməsi ehtimalı mövcuddur. Bu baxımdan, yeni texnologiyalara uyğun bacarıqların inkişaf etdirilməsi və inklüziv yanaşmanın təmin edilməsi vacibdir.
Çıxışlarda, həmçinin diqqətə çatdırılıb ki, süni intellekt sistemləri düzgün hazırlanıb və səmərəli nəzarət mexanizmləri ilə müşayiət olunduğu halda, işə qəbul və əməkdaşların qiymətləndirilməsi proseslərində daha obyektiv qərarların qəbuluna dəstək verə bilər.
Sessiyada süni intellektin yaratdığı imkanlarla yanaşı, işəgötürənlər və işçilər üçün meydana çıxan çağırışlar, əmək hüquqlarının qorunması və bu sahədə beynəlxalq əməkdaşlığın əhəmiyyəti ətrafında fikir mübadiləsi aparılıb. Panel iştirakçıları texnoloji inkişafla insan hüquqları arasında balansın qorunmasının vacibliyini vurğulayıblar.
Bölmənin digər xəbərləri
