ON BIR BÖLGƏDƏ AQROSERVİSLƏR YARADILACAQDIR

20.10.2005 [10:55]
Çap et
A⁺ A^-

“Aqrolizinq” Dövlət Səhmdar Cəmiyyəti respublikamızın 11 şəhər və rayonunda - Bakı, Gəncə, Naxçıvan, Əli Bayramlı, Yevlax, Şamaxı, Xaçmaz, Şəki, Cəlilabad, İmişli və Tovuzda kənd təsərrüfatı texnikası təchizat-servis bazaları yaradacaqdır. Cəmiyyətin sədri Tariyel Rəsulov AZƏRTAC-ın müxbirinə demişdir ki, xarici ölkələrdən alınan maşın və mexanizmlər hələlik Kənd Təsərrüfatı Nazirliyinin Ucardakı sərgi-satış yarmarkaları bazasında və Əli Bayramlı komplektləşdirmə bazasında saxlanılır.

Bu günədək Türkiyədən 636 ədəd müxtəlif kənd təsərrüfatı texnikası gətirilmişdir. İndi isə Çindən traktor və kombaynlar alınır. Ümumiyyətlə, səhmdar cəmiyyət 1200-ə qədər kənd təsərrüfatı texnikası alacaqdır. Texnika torpaq mülkiyyətçilərinə girovla veriləcəkdir. Gələcəkdə texnikanın icarəyə verilməsinin sadələşdirilmiş üsulları da tətbiq ediləcəkdir.

“Aqrolizinq” torpağın səpinə hazırlanmasından tutmuş məhsulun yığılmasınadək kompleks xidmətlər göstərməyi də nəzərdə tutur.