İQTİSADİYYAT
Ordubad Su Elektrik Stansiyasının təməli qoyulmuşdur
Ordubad, 5 oktyabr (AZƏRTAC). Oktyabrın 4-də Ordubad Su Elektrik Stansiyasının təməli qoyulmuşdur.
Naxçıvan Muxtar Respublikası Ali Məclisinin sədri Vasif Talıbov stansiyanın tikiləcəyi əraziyə gəlmişdir.
Ali Məclisin sədri Ordubad Su Elektrik Stansiyasının təməlinin qoyulması münasibətilə inşaatçıları və muxtar respublikanın sakinlərini təbrik edərək demişdir: Son illər muxtar respublikamızda energetika sahəsində mühüm tədbirlər həyata keçirilmişdir. Hazırda muxtar respublikamız özünün elektrik enerjisinə olan tələbatını ödəməklə bərabər, eyni zamanda, vaxtilə qardaş Türkiyədən alınmış elektrik enerjisinin də əvəzini qaytarır. Ölkəmizdə bərpa olunan enerji mənbələrindən lazımınca istifadənin, enerji təhlükəsizliyinin təmin olunması istiqamətində görülən işlərin nəticəsidir ki, Naxçıvan Muxtar Respublikası elektrik enerjisi alan regiondan elektrik enerjisi ixrac edən regiona çevrilmişdir. Müstəqillik illərində muxtar respublikada 50 meqavat gücündə Qaz Turbin Elektrik Stansiyası, Heydər Əliyev Su Anbarı üzərində 4,5 meqavat gücündə Su Elektrik Stansiyası, 87 meqavat gücündə Modul Elektrik Stansiyası, 22 meqavat gücündə Biləv Su Elektrik Stansiyası tikilib istifadəyə verilmişdir. Hazırda 20,5 meqavat gücündə Arpaçay Su Elektrik Stansiyasının tikintisi davam etdirilir. Ordubad rayonunda yeni su elektrik stansiyasının tikintisinə başlanılması da ulu öndər Heydər Əliyevin müəyyənləşdirdiyi sosial-iqtisadi inkişaf strategiyasının daha bir nümunəsidir.
“Enerji təhlükəsizliyi hər bir ölkənin müstəqilliyinin ən vacib meyarlarından biridir”, - deyən Ali Məclisin sədri bildirmişdir ki, Prezident İlham Əliyevin yüksək diqqət və qayğısı nəticəsində qısa vaxtda ölkədə enerji asılılığı aradan qaldırılmış, Azərbaycan dünyada zəngin enerji resurslarına malik olan dövlətə çevrilmişdir. Artıq ölkəmiz dünyada enerji ixracatçısı kimi də tanınır. Bu günlərdə Azərbaycanda günəş və külək elektrik enerjisi stansiyası işə salınmışdır. Muxtar respublikamızda da külək və günəş enerjisi stansiyalarının qurulması işlərinə qısa müddətdə başlanacaqdır.
Elektrik enerjisi istehsalında su elektrik stansiyalarının özünəməxsus yerinin olduğunu bildirən Ali Məclisin sədri təməli qoyulan Ordubad Su Elektrik Stansiyasının da muxtar respublikanın enerji təminatı ilə bərabər, həm də yeni iş yerlərinin açılmasına səbəb olacağını bildirmiş, stansiyanın inşası və istismarının yerli mütəxəssislər tərəfindən həyata keçiriləcəyinin əhəmiyyətini qeyd etmişdir.
Ali Məclisin sədri stansiyanın tikilib-qurulmasında iştirak edəcək inşaatçılara və mütəxəssislərə uğurlar arzulamış, obyektin baş planı ilə tanış olmuşdur.
Naxçıvan Muxtar Respublikası Dövlət Energetika Agentliyinin baş direktoru Yasin Səfərov məlumat vermişdir ki, gücü 36 meqavat olan stansiyada il ərzində 190 milyon kilovat/saat elektrik enerjisi istehsal ediləcəkdir ki, bu da muxtar respublikada 2010-cu ildə sərf olunan elektrik enerjisinin 50 faizi deməkdir.
Layihəyə əsasən, stansiyada tənzimləyici bənd, saniyədə 126,6 kubmetr su ötürmək gücünə malik olan suqəbuledici qurğu, durulducu hovuzu, derivasiya kanalı, 80 min kubmetr su tutumuna malik olan basqılı hovuz, stansiya binası və aparıcı kanal inşa olunacaq, transformator yarımstansiyası quraşdırılacaqdır.
Baş planla tanışlıqdan sonra Ali Məclisin sədri stansiyanın bünövrəsinə beton qarışığı tökmüş, tikinti işlərinin aparılması barədə müvafiq tapşırıqlar vermişdir.
Ordubad Su Elektrik Stansiyasının 2013-cü ildə istifadəyə verilməsi nəzərdə tutulub.
######