“Osaka 2025” sərgisini 10 milyon nəfər ziyarət edib
Pekin, 13 iyul, AZƏRTAC
Yaponiyanın Osaka şəhərində “Həyatımız üçün gələcək cəmiyyəti formalaşdıraq” (Designing the Future Society for Our Lives) mövzusunda keçirilən “Ekspo 2025” sərgisini 3 ay ərzində 10 milyon nəfər ziyarət edib.
AZƏRTAC xəbər verir ki, bu barədə sərginin təşkilat komitəsi məlumat yayıb. Təşkilatçılar isti hava ilə əlaqədar sərgiyə marağın azalmamsı üçün müvafiq işlər görür. Bura əlavə su təchizatı nöqtələrinin, kölgələnmək üçün çətirlərin və spot soyuducuların quraşdırdırlması daxildir.
Qeyd edək ki, aprelin 13-də başlayan “Osaka Ekspo 2025”də 158 ölkə təmsil olunur. Heydər Əliyev Mərkəzinin təşkilatçılığı ilə yaradılan Azərbaycan milli pavilyonu “Ekspo 2025”in “Həyatları əlaqələndirmək” (“Connecting Lives”) bölməsində yerləşməklə “Dayanıqlı inkişafa doğru yeddi körpü” (“Seven bridges for sustainability”) mövzusunu əhatə edir. Pavilyonun konsepsiyası dahi Azərbaycan şairi və mütəfəkkiri Nizami Gəncəvinin “Yeddi gözəl” poemasından qaynaqlanıb. Burada Azərbaycanın zəngin mədəni irsi, texnoloji inkişaf və davamlı inkişafa bağlılığı, eyni zamanda, dialoqa açıqlığı nümayiş olunur. Ziyarətçilər pavilyondakı səyahətlərinə nəhəng yeddi gözəlin hər birinin təcəssüm etdirdiyi müxtəlif istiqamətlərlə - mədəni müxtəliflik, mədəni irs, ənənəvi incəsənət, memarlıq inciləri, davamlı inkişaf, təbii sərvətlər, idman və turizm sahələri ilə tanışlıqla başlayırlar. Pavilyonda Azərbaycan və Yaponiyanı tərənnüm edən “Dostluq ağacı” da yer alır. Sərgi çərçivəsində iyunun 5-də Azərbaycan Milli Günü keçirilib.
Oktyabrın 13-dək sərgini 28 milyon nəfərin ziyarət edəcəyi gözlənilir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
