Özbəkistanda Azərbaycanın aqrar inkişafı və elmi potensialı təqdim olunub
Bakı, 25 mart, AZƏRTAC
Özbəkistanın paytaxtı Daşkənd şəhərində İtaliya, Mərkəzi Asiya ölkələri və Azərbaycanın iştirakı ilə keçirilən “Dayanıqlı aqroekosistemlər üçün innovasiyalar, bərpaedici kənd təsərrüfatı və rəqəmsallaşma” mövzusunda aqrobiznes forumu çərçivəsində təşkil olunan “Elm, Tədqiqat və Təhsil” adlı paneldə Azərbaycanda aqrar sahənin mövcud vəziyyəti, bu sahədə tədqiqat ekosistemi və elmi araşdırmaların kənd təsərrüfatının inkişafında roluna həsr olunan təqdimat keçirilib.
Bu barədə AZƏRTAC-a Kənd Təsərrüfatı Nazirliyindən məlumat verilib.
Aqrar Tədqiqatlar Mərkəzinin rəhbəri Rəşad Hüseynov öz təqdimatında elmi tədqiqatların dayanıqlı kənd təsərrüfatının əsası olduğunu vurğulayıb. Təqdimatda aqrar sahənin ölkənin qeyri neft-qaz sektorunun inkişafındakı rolu ilə yanaşı, iqlim dəyişiklikləri, su qıtlığı və artan tələbat şəraitində innovasiya və texnoloji modernizasiyanın təşviqində aqrar elmin strateji əhəmiyyəti xüsusi olaraq vurğulanıb. Eyni zamanda, ölkədə aqrar elmin mövcud vəziyyəti, institusional strukturu və insan kapitalı potensialı barədə ətraflı məlumat təqdim edilmiş, tədqiqatların effektivliyi və innovativ yanaşmaların tətbiqi imkanları diqqətə çatdırılıb.
Təqdimatlardan sonra iştirakçıların sualları cavablandırılıb, kənd təsərrüfatının inkişafı istiqamətində birgə elmi tədqiqatların həyata keçirilməsi imkanları xarici elmi-tədqiqat institutları və ali təhsil müəssisələri ilə müzakirə edilib. Bununla yanaşı, aqrar sahədə mövcud investisiya imkanları barədə məlumatlar xarici iş adamları və özəl sektor nümayəndələri ilə bölüşülüb.
Bölmənin digər xəbərləri
