Pakistan mətbuatı Bakı İqlim Fəaliyyəti Həftəsindən yazıb
Bakı, 14 sentyabr, AZƏRTAC
Pakistan mətbuatı sentyabrın 7-11-də Azərbaycan paytaxtında keçirilən Bakı İqlim Fəaliyyəti Həftəsinə dair “Bakı İqlim Fəaliyyət Həftəsi: öhdəliklərdən fəaliyyətə keçid” adlı məqalə yayıb.
AZƏRTAC xəbər verir ki, “Qlobal Əməkdaşlıq və Analitik Araşdırmalar Mərkəzi” İctimai Birliyinin sədri Xəyalə Məmmədovanın müəllifi olduğu məqalədə qlobal iqlim çağırışlarına cavab verən həllərin təşviqi və bu istiqamətdə beynəlxalq əməkdaşlığın gücləndirilməsi baxımından İqlim Fəaliyyəti Həftəsinin əhəmiyyətindən bəhs edilir.
Müəllif qeyd edir ki, tədbir Azərbaycan və Türkiyənin iqlim gündəliyi üzrə rəsmilərini, COP30 və COP31-in rəhbərliklərini, beynəlxalq təşkilatların nümayəndələrini, iqlim üzrə yüksəksəviyyəli çempionları, investorları, akademik dairələri və vətəndaş cəmiyyəti nümayəndələrini bir araya gətirib. Həftə çərçivəsində konkret iqlim həllərinin təşviqi, yeni tərəfdaşlıqların qurulması və investisiya imkanlarının genişləndirilməsi məsələləri müzakirə olunub.
Tədbir çərçivəsində geosiyasi dəyişikliklərin beynəlxalq iqlim əməkdaşlığına təsiri, enerji təhlükəsizliyi, iqtisadi rəqabətqabiliyyətlilik, səhiyyə, ərzaq sistemləri, texnologiya, iqlim maliyyələşməsi, sənayenin karbonsuzlaşdırılması, dayanıqlı inkişaf və iqlim dəyişmələrinin təsirlərinin azaldılması kimi aktual mövzular ətrafında dəyirmi masalar, panel müzakirələri və konfranslar keçirilib.
Məqalədə, həmçinin COP29-dan COP31-ə keçid mərhələsində iqlim gündəliyində əldə olunmuş dinamikanın qorunması, iqlim öhdəliklərinin konkret nəticələrə çevrilməsi və COP31-ə qədər icra prosesinin sürətləndirilməsinin vacibliyi vurğulanıb. Bu məqsədlə bütün maraqlı tərəflər arasında daha sıx əməkdaşlığın gücləndirilməsinin əhəmiyyətinə diqqət çəkilib.
Məqalənin tam mətnini aşağıdakı linkdən oxumaq mümkündür.
Bölmənin digər xəbərləri
