Pakistanlı ekspert: Regionda gərginliyin azaldılması prosesləri Bakının maraqlarına cavab verir
Bakı, 23 aprel, AZƏRTAC
Pakistan, İslamabad Sülh Prosesində vasitəçi kimi çıxış edərək, İran ilə ABŞ arasında gərginliyi azaltmaq üçün diplomatik səylərini artırıb. Tərəflər arasında iki həftəlik atəşkəsi təmin etməyə və Tehran və Vaşinqton nümayəndələri arasında ilk birbaşa danışıqları təşkil etməyə nail olan məhz Pakistan olub.
Bu barədə AZƏRTAC-a Ortaq Gələcək İcması üzrə Pakistan Tədqiqat Mərkəzinin (Pakistan Research Center for a Community with Shared Future, PRCCSF) icraçı direktoru Xalid Taymur Əkrəm bildirib.
“1979-cu il İslam İnqilabından sonra İran və ABŞ rəhbərliyi heç vaxt birbaşa, üzbəüz danışıqlar aparmayıb. Heç bir ölkə onları eyni masaya gətirməyə nail olmayıb, lakin Pakistan heç kimin edə bilmədiyinə nail olub. Danışıqlar 2026-cı il aprelin 11-12-də İslamabadda baş tutub və hərbi qarşıdurmaya son qoymaq, İranın nüvə proqramını müzakirə etmək, sanksiyaları ləğv etmək, qlobal enerji marşrutlarının təhlükəsizliyini təmin etmək və hərbi eskalasiyanın qarşısını almaq məqsədi daşıyan genişmiqyaslı diplomatik təşəbbüsün bir hissəsi olub”, - deyə agentliyin həmsöhbəti qeyd edib.
Onun sözlərinə görə, ABŞ və İsrailin İranın hərbi və dövlət obyektlərinə zərbələrindən sonra şiddətlənən münaqişə regionda ciddi qeyri-sabitliyə, Hörmüz boğazının bağlanmasına və qlobal enerjidaşıyıcılarının qiymətlərinin artmasına səbəb olub. Dünya daha geniş regional müharibənin astanasındadır.
“Pakistan münaqişədə tərəf tutmayaraq, aktiv neytrallıq mövqeyini nümayiş etdirdi. Baş nazir Məhəmməd Şahbaz Şərif və feldmarşal Seyid Asim Munir Əhməd Şahın rəhbərlik etdiyi ölkə rəhbərliyi İran, ABŞ, Çin, Körfəz ölkələri və digər regional oyunçularla intensiv məsləhətləşmələr aparır. Dünya təhlükəli müharibənin astanasında olanda Pakistan qarşıdurma əvəzinə dialoqu seçdi”, - deyə ekspert vurğulayıb.
İran ətrafında baş verən hadisələrin Azərbaycan üçün regional təhlükəsizlik və enerji sabitliyi baxımından xüsusi əhəmiyyət kəsb etdiyini qeyd edən icraçı direktor əlavə edib ki, Hörmüz boğazı və qlobal enerji təchizatı marşrutları ətrafındakı vəziyyətdə hər hansı bir dəyişiklik Azərbaycan da daxil olmaqla, beynəlxalq bazarlarda əks olunur.
“Bundan əlavə, regionda gərginliyin azaldılması prosesləri Cənubi Qafqazda ümumi sabitliyin möhkəmləndirilməsinə töhfə verir ki, bu da regional diplomatiya və enerji əməkdaşlığında mühüm iştirakçı kimi Bakının maraqlarına cavab verir. Danışıqların birinci mərhələsi yekun razılaşma olmadan başa çatsa da, Pakistan vasitəçilik səylərini davam etdirir və məsləhətləşmələrin ikinci mərhələsinə hazırlıq üzərində işləyir. Uzunmüddətli sülhə aparan yeganə davamlı yol hərbi ssenarilər deyil, məhz diplomatiya olaraq qalır”, - deyə Xalid Taymur Əkrəm sözünü yekunlaşdırıb.
Müəllif – Pərvanə Qafarova
Bölmənin digər xəbərləri
