AZƏRTAC xəbər verir ki, mayın 9-da Zirə qəsəbəsində park kompleksi istifadəyə verilmişdir.

Mərasimə toplaşanlar Azərbaycan Prezidenti İlham Əliyevi və xanımı Mehriban Əliyevanı hərarətlə salamladılar.

Heydər Əliyev Fondunun dəstəyi ilə tamamilə yenidən qurulmuş kompleksdə mədəniyyət və şadlıq evləri, idman və uşaq meydançası tikilmiş, sakinlərin istirahəti üçün hər cür şərait yaradılmış, ərazi yaşıllaşdırılmış, dekorativ ağaclar və gül kolları əkilmişdir.

Kompleksin mərkəzində ulu öndər Heydər Əliyevin büstü qoyulmuşdur.

Prezident İlham Əliyev büstün üzərindəki ağ örtüyü götürdü.

Dövlətimizin başçısı və xanımı büstün önünə gül dəstələri düzdülər.

Sonra onlar qəsəbə sakinləri ilə səmimi söhbət etdilər.

HACI ƏLİSAHİB (qəsəbə sakini): - Möhtərəm Prezident, qəsəbəmizə gəldiyinizə görə, hamının adından, öz adımızdan Sizə dərin təşəkkürümüzü bildiririk. Sizin bura gəlməyiniz bizim üçün çox şərəfdir. Buraya gəlməyinizlə bizi həm həddən artıq sevindirir, həm də boynumuza böyük haqq, məsuliyyət qoyursunuz. Mənim 70 yaşım var, ikinci dəfədir, Prezidenti görürəm. Bu, bizim sadə Zirə camatına yox, bütün sadə Azərbaycan xalqına verilən ən böyük qiymətdir. Ona görə bilmirik Sizə necə minnətdarlıq edək.

İcazə verin, qəsəbəmiz haqqında Sizə bir az məlumat verim. Camaatın əksəriyyəti neft sahəsində işləyir. Bir hissəsi də vaxtilə sovxozda işləyirdi. Möhtərəm Prezident, keçid dövrü ilə əlaqədar bizdə də müəyyən çətinliklər yarandı. Elektrik enerjisinin çatışmaması, iş yerlərinin azalması, bir də rayon mərkəzindən, şəhərdən uzaq olmağımız, imkanlı adamların çıxıb getməsi elə bil əhalidə düşkünlük yaratmışdı. Mərhum Prezidentimiz, ulu öndərimiz respublikanın o çətin vaxtında xalqa pənah əlini uzatdı, onun dadına çatdı. Sonra da Mehriban xanım bizim dadımıza çatdı. Biz başa düşürük, Bakının istənilən rayonundan namizədliyini versəydi, ona 100 faiz səs verərdilər. Amma bizi qəbul etdi. Həm rayonumuz uzaqdır, həm də ən inkişafdan qalan Türkan, Zirə kimi qəsəbələri vardı. Bu, bizə qarşı çox böyük hörmətdir. İndi baxın nəticəsi budur, möhtərəm Prezident. Görürsünüz, qəsəbə nə qədər təmir olunur. Hələ bu, görünən tərəflərdir, möhtərəm Prezident. Görünməyən tərəfləri də deyim Sizə. Qəsəbəmizin asfaltlanmayan tək-tək küçələri qalıbdır. Gözəl əsas küçələr işıqlandırılıbdır. Bunlar hamısı Mehriban xanımın zəhmətidir. Əlbəttə, Sizin rəhbərliyiniz altında. Bilmirik Mehriban xanıma, Sizə necə minnətdarlıq edək, çox sağ olun. Amma əsas sağolumuzu, qismət olsa, seçkidə deyəcəyik. Mən inanıram ki, səsvermədə təkcə qəsəbəmiz yox, bütün rayonumuz lider olacaqdır. Bir daha Sizə minnətdarlığımızı bildiririk, möhtərəm Prezident.

İLHAM ƏLİYEV: Təşəkkür edirəm. Mən də çox şadam ki, Zirə qəsəbəsi öz simasını çox böyük dərəcədə dəyişibdir. Burada siz bizim xidmətlərimizdən danışdınız. Bu, bizim borcumuzdur. Mənim Prezident kimi, Mehribanın isə sizin deputatınız kimi. Borcumuzdur ki, öz seçicilərimizə həmişə diqqətli olaq, Azərbaycanda gedən və rayonda gedən işlərə daha da böyük təkan verək. Təşəbbüs göstərək ki, insanların həyat səviyyəsi yaxşılaşsın, sosial sahədə işlər yaxşı getsin, bütövlükdə quruculuq-abadlıq işləri aparılsın. Zirənin timsalında biz bütün bunları görürük. Görürük ki, sosial məsələlər həll olunur. Mən indicə gözəl xəstəxananın açılışında iştirak etdim. Hansı ki, siz bilirsiniz, uzun illər, onilliklər yarımçıq qalmış bina idi və ümumiyyətlə, onun gələcəyi qeyri-müəyyən idi. Amma indi ən müasir səviyyədə təmir edilib, demək olar ki, yenidən tikilib və orada ən müasir tibb avadanlığı var. Doğum şöbəsi də var və bu da hər bir yer üçün, xüsusilə, şəhərdən bir az aralıda yerləşən qəsəbələr, kəndlər üçün çox vacibdir. Burada stadion, mədəniyyət evi də var.

Bu gün mən həm Bakıda, həm də burada veteranlarla görüşdüm. Burada xatirə kompleksinin açılışını etdik. Yəni bütün bunlar yenilik, quruculuq, inkişaf deməkdir. Azərbaycanın artan imkanları bizə əlavə şərait yaradır ki, biz bunu daha da tez bir zamanda edək. Əlbəttə, maddi imkanlar vacib rol oynayır. Amma əgər insanların ürəyi yanmasa, əgər təşəbbüs göstərilməsə, maddi imkan nə qədər olsa da, nəticəsi olmayacaq. Zirədə, ətraf qəsəbələrdə gedən böyük işləri mən yüksək qiymətləndirirəm. Bu, belə də olmalıdır. Bütün xalq tərəfindən seçilmiş nümayəndələr xalqa xidmət etməlidir. İstər Prezident olsun, istərsə də parlament üzvü, bələdiyyə sədri. Bütün xalq tərəfindən seçilmiş insanlar və Prezident tərəfindən təyin olunmuş insanlar böyük məsuliyyətlə və xalq üçün işləməlidirlər. Mənim baxışlarım bunlardır, mənim siyasi əqidəm budur. Mən bu vəzifəyə xalqa xidmət etmək üçün gəlmişəm və hər dəfə yenilik, müasirlik görəndə ürəyim sevinir. Azərbaycanın bütün yerləri bax, belə olmalıdır. Nəzərə alsaq ki, üç il bundan əvvəl burada vəziyyət tam başqa idi, - siz bunu məndən yaxşı bilirsiniz, - bu müddət ərzində görülən işləri mən çox yüksək qiymətləndirirəm. Bunda Zirə sakinlərinin böyük əməyi olubdur, bütün bu təşəbbüslərdə onlar fəal iştirak etmişlər. Onlar tərəfindən qaldırılan məsələlər öz həllini tapmışdır. Çünki siz hamıdan yaxşı bilirsiniz ki, problemləriniz nədir. Həm yerli sakinlərin, həm mərkəzi orqanların, sizin tərəfinizdən seçilmiş insanların birgə fəaliyyəti bütün bu gözəlliyi yaratmışdır. Mən çox sevinirəm ki, Zirənin yeni görkəmi dünyanın ən qabaqcıl şəhərlərinin səviyyəsindədir. Siz də buna layiqsiniz və gələcəkdə daha da böyük işlər görüləcəkdir.

X X X

Sonra dövlətimizin başçısı və xanımı mədəniyyət evi ilə tanış oldular. Burada 120 yerlik salon, kitabxana, dərnək otaqları, kompyuter otağı var.

Mədəniyyət evində Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın fəaliyyətinə həsr olunmuş guşə də var.

Prezident İlham Əliyev və Mehriban xanım mədəniyyət evinin eyvanından parkın ərazisini seyr etdilər, sonra uşaq meydançasında qəsəbənin balaca sakinləri ilə səmimi söhbət etdilər, şəkil çəkdirdilər.

Dövlətimizin başçısı və xanımı daha sonra kompleksin ərazisindəki 400 nəfərlik şadlıq sarayı ilə də tanış oldular.

Abadlıq və quruculuq işlərinin aparıldığı qəsəbədə zövqlə tikilmiş binalarda bütün lazımi xidmətlər və idarələr fəaliyyət göstərir ki, bu da sakinlər üçün böyük rahatlıq yaradır.

X X X

Mayın 9-da Heydər Əliyev Fondunun dəstəyi ilə Qala qəsəbəsində milli memarlıq üslubunda tikilmiş alaqapının açılışı olmuşdur.

######