“Parla” təqaüd və inkişaf proqramına qəbul üçün qeydiyyat başlanıb
Bakı, 16 sentyabr, AZƏRTAC
Təhsilin İnkişafı Fondu (TİF) ilə “NEQSOL Holding”in birgə əməkdaşlığı çərçivəsində həyata keçirilən “Parla” təqaüd və inkişaf proqramına qəbul açıq elan edilir.
Fonddan AZƏRTAC-a bildirilib ki, proqrama ölkə üzrə bütün ali təhsil müəssisələrində bakalavriat təhsili alan tələbə qızlar müraciət edə bilərlər. Proqram çərçivəsində seçilmiş tələbələr aylıq təqaüdlə yanaşı, təcrübə, mentorluq, təlimlər və “NEQSOL Academy” ilə “LinkedIn Learning” vasitəsilə dünyanın aparıcı universitetlərinin proqramlarına çıxış kimi imkanlardan yararlanacaqlar.
Proqrama aşağıdakı meyarlara cavab verən şəxslər müraciət edə bilərlər:
- Azərbaycan Respublikasının vətəndaşı olmalı;
- Azərbaycan Respublikasının elmi müəssisə və təşkilatlarında əyani təhsilalma forması olan bakalavriat təhsili almalı;
- Qeyd olunan ixtisaslardan biri üzrə təhsil almalı;
- Ali təhsil müəssisəsinin bakalavriat səviyyəsinə qəbul imtahanında minimum 450 bal toplamalı;
- Ümumi orta müvəffəqiyyət göstəriciləri 80 faizdən yuxarı olmalı;
- Dərsdənkənar fəaliyyətlərdə fəal iştirak etməli (könüllülük, sosial fəaliyyət və s.);
Aşağıdakı sosial meyarlardan birinə cavab verməlidir:
– ünvanlı dövlət sosial yardımı alan ailənin üzvü;
– valideynləri olmayan və ya uşaq evində böyümüş şəxs.
Hər iki valideyni (tək valideyni olduqda isə həmin şəxs) aşağıda qeyd olunan kateqoriyaların hər hansı birinə aid olan şəxs:
– I, II və ya III dərəcə əlilliyi müəyyən edilmiş şəxslər;
– İşsiz kimi qeydiyyatda olan şəxslər;
– İş yeri olmayan və yaşa görə əmək pensiyası alan şəxslər;
– İş yeri olmayan və yaşa görə sosial müavinət alan şəxslər.
Qeyd: Yuxarıdakı sosial meyarlara cavab verən I kurs tələbələrinin seçimi zamanı qəbul imtahanında toplanılan bal əsas götürülür.
Seçim prosesi onlayn müraciət, qiymətləndirmə və müsahibə mərhələlərindən ibarət olacaq. Seçim zamanı akademik göstəricilər və motivasiya məktubu nəzərə alınacaqdır. Yekun seçimdə müsahibə mərhələsində göstərilən nəticə əsas götürülür. Müsahibə zamanı namizədlərə hədəfləri, sosial vəziyyəti, fəaliyyəti, tələbə həyatı ilə bağlı suallar veriləcək. Bütün mərhələlərdən uğurla keçən 50 tələbə qız aylıq 200 manat məbləğində təqaüd əldə edəcək və proqram çərçivəsində onlara təqdim olunan şəxsi və peşəkar inkişaf fəaliyyətlərində iştirak edəcəklər.
“Parla” təqaüd və inkişaf proqramı üçün müəyyən edilmiş ixtisasların siyahısı ilə buradan tanış ola bilərsiniz.
Müraciətlər oktyabrın 12-dək qəbul ediləcək.
Qeyd edək ki, Fondun təşkil etdiyi digər təqaüd proqramlarından yararlanmış şəxslər bu layihəyə müraciət edə bilməz.
Bölmənin digər xəbərləri
