SİYASƏT
Parlamentin komitə iclasında bəzi kəndlərin adlarının dəyişdirilməsi ilə bağlı qanun layihəsi müzakirə edilib
Bakı, 15 may, AZƏRTAC
Mayın 15-də Milli Məclisin regional məsələlər komitəsinin iclasında “Azərbaycan Respublikasının Ağcabədi, Ağdam, Ağdaş, Astara, Bərdə, Cəlilabad, Gədəbəy, Göyçay, Xaçmaz, İsmayıllı, Kəlbəcər, Kürdəmir, Quba, Laçın, Tərtər, Ucar və Zaqatala rayonlarının bəzi kəndlərinin adlarının dəyişdirilməsi barədə” qanun layihəsi müzakirə edilib.
AZƏRTAC xəbər verir ki, komitənin sədri Arif Rəhimzadə qanun layihəsi barədə məlumat verərək deyib ki, bu layihə uzun müddət ərzində ərsəyə gəlib. Layihədə 17 rayon üzrə 31 yaşayış məntəqəsinin adının dəyişdirilməsi nəzərdə tutulur. Üç məsələnin həllinin nəzərdə tutulduğu layihədə birinci məsələ 15 rayonda 27-dən çox eyniadlı yaşayış məntəqəsinin adlarının dəyişdirilməsidir. Məsələn, Kəlbəcərdə 8, Gədəbəydə 8, Cəlilabada 6 və s. yaşayış məntəqələrinin adlarının dəyişdirilməsi nəzərdə tutulur. İkinci məsələ 3 rayonda bir sıra yaşayış məntəqələrinin adlarının dəyişdirilməsidir. Üçüncü məsələ isə 3 inzibati-ərazi dairəsinin adlarının dəyişdirilməsidir.
İclasda çıxış edən deputatlar qanun layihəsinin vacibliyindən danışıblar.
Müzakirələrdən sonra layihə Milli Məclisin plenar iclasına tövsiyə olunub.