PARLAMENTLƏ YUNİSEF ARASINDA ƏMƏKDAŞLIĞIN ÖNCÜL İSTİQAMƏTLƏRİ MÜZAKİRƏ EDİLMİŞDİR
Martın 6-da Milli Məclisdə “Müasir qanun yaradıcılığında əməkdaşlıq təcrübəsi” mövzusunda keçirilmiş seminarda Azərbaycan parlamenti ilə BMT-nin Uşaq Fondu /YUNİSEF/ arasında əməkdaşlığın əsas məsələləri müzakirə edilmişdir.
Milli Məclis sədrinin birinci müavini Arif Rəhimzadə seminarı açaraq dedi ki, Azərbaycan müstəqillik əldə etdikdən sonra ölkənin beynəlxalq təşkilatlara inteqrasiyası prosesi başlanmışdır. Bu beynəlxalq təşkilatların ən nüfuzlusu BMT-dir. Onun ən mühüm bölmələrindən biri olan YUNİSEF ölkəmizdə fəaliyyət göstərdiyi dövrdə mühüm beynəlxalq konvensiyaları ictimaiyyətə çatdırmaq üçün ayrı-ayrı hökumət qurumları və parlamentlə sıx əməkdaşlıq edir. Bu yaxınlarda Milli Məclisdə YUNİSEF-in köməyi ilə yod çatışmazlığı ilə bağlı xəstəliklər haqqında qanun layihəsi işlənib hazırlanmış və təsdiq olunmuşdur.
YUNİSEF-in Azərbaycandakı nümayəndəliyinin başçısı Akif Saatçıoğlu “Azərbaycanda uşaqların və qadınların vəziyyəti YUNİSEF və Milli Məclis arasında əməkdaşlığın əsas istiqamətlərindən biri kimi: tarix, indiki zaman və gələcək üçün perspektivlər” mövzusunda məruzə etdi. O vurğuladı ki, 1993-cü ildən Azərbaycanda fəaliyyət göstərən bu təşkilat hər il qadınların və uşaqların vəziyyətini araşdırır və onun nəticələrinə dair xülasə buraxır. Sonra Akif Saatçıoğlu YUNİSEF-in layihələri və büdcəsi barədə seminar iştirakçılarına ətraflı məlumat verdi. Bildirildi ki, bu təşkilatın mərkəzi ofisi Azərbaycanda təhsil və səhiyyə sahəsində müxtəlif layihələrin həyata keçirilməsi üçün hər il 3 milyon dollar vəsait ayırır.
Sosial siyasət daimi komissiyasının sədri Hadı Rəcəbli qadınların və uşarqların problemlərinin həllinə yönəldilmiş qanun yaradıcılığı prosesindən danışdı. Milli Məclisin elm və təhsil məsələləri daimi komissiyasının sədri Şahlar Əsgərov və iqtisadi siyasət daimi komissiyasının sədri Səttar Səfərov parlament komissiyalarının YUNİSEF-lə əməkdaşlığı mövzusuna toxundular.
Seminarın axırında qeyri-hökumət təşkilatlarının nümayəndələri və deputatlar BMT-nin Uşaq Hüquqları Konvensiyasına dair ətraflı fikir mübadiləsi apardılar. Çıxış edənlərin hamısı Ermənistanın təcavüzü nəticəsində qaçqın -köçkün düşmüş qadınların və uşaqların hüquqlarının pozulmasından danışaraq, beynəlxalq təşkilatlar tərəfindən onlara yardım göstərilməsinin zəruriliyini vurğuladılar.
Bölmənin digər xəbərləri
