Bakı, 27 may, AZƏRTAC

Azərbaycan Respublikası müstəqilliyini bərpa etdikdən sonra uğurlu xarici siyasət yeridir. Bu siyasət Azərbaycan dövlətçiliyinin sistemli şəkildə möhkəmlənməsinə və inkişafına, milli maraqların qorunmasına yönəlib. Ölkəmizin xarici siyasəti beynəlxalq hüququn norma və prinsipləri, o cümlədən dövlətlərin suverenliyinə və ərazi bütövlüyünə hörmət, daxili işlərə qarışmamaq əsasında qurulur. Bu gün Azərbaycan beynəlxalq aləmdə öz mövqelərini daha da möhkəmləndirir.

Ölkəmiz müstəqil dövlət kimi bir sıra beynəlxalq təşkilatların üzvüdür. Bu gün Azərbaycan transmilli layihələrin, qlobal təhlükəsizlik məsələlərinin, Avropanın enerji təhlükəsizliyinin icraçısı kimi müasir beynəlxalq münasibətlər sistemində əməkdaşlığın qurulmasına töhfə verən fəal aktor və regional güc kimi tanınır. Ölkə iki dəfə dünyanın ən nüfuzlu qurumu olan BMT Təhlükəsizlik Şurasına sədrlik edib. Hazırda Azərbaycan BMT-dən sonra ikinci böyük təşkilata - Qoşulmama Hərəkatına sədrlik edir. Bu, əlbəttə ki, bu təşkilatlara üzv olan çoxsaylı dövlətlərin Azərbaycana göstərdiyi etimadın gözəl nümunəsidir. Bundan başqa, Azərbaycanın Qərb və Şərq sivilizasiyaları, eləcə də Şimal və Cənub arasında dəhliz rolu oynaması onun mühüm ölkə kimi nüfuzunu nümayiş etdirir. Təbii ki, Azərbaycanın bu cür nailiyyətləri praqmatik və rasional xarici siyasətin nəticəsidir. Əsası xalqımızın Ümummilli Lideri Heydər Əliyev tərəfindən qoyulmuş Azərbaycan dövlətinin inkişaf konsepsiyası, bu gün dövlətimizin başçısı İlham Əliyevin rəhbərliyi ilə məharətlə icra olunur.

Bu fikirləri AZƏRTAC-a açıqlamasında beynəlxalq əlaqələr üzrə analitik Masil Dəmirov söyləyib.

Onun sözlərinə görə, Azərbaycan iqtisadiyyatında müstəqilliyin bütün dövrü ərzində dayanıqlılıq və artım nümayiş etdirilməsinə dair göstəricilər, bizim tam iqtisadi müstəqilliyə nail olduğumuzun sübutudur. Son 30 ildə Azərbaycan iqtisadiyyat, enerji, nəqliyyat, mədəniyyət, din, elm, təhsil və təhlükəsizlik sahələrində çox mötəbər beynəlxalq layihələrin əsasında duran aparıcı qüvvəyə çevrilib. Bu gün Böyük İpək Yolunun üzərində yerləşən Azərbaycan Respublikası siyasi, iqtisadi, mədəni, nəqliyyat və digər sahələrdə Şərqlə Qərb, Şimalla Cənub, Avropa ilə Asiya, İslam və xristian dünyaları arasında beynəlxalq əhəmiyyətli körpüdür. Eyni zamanda, Azərbaycan Bakı-Tbilisi-Ceyhan, Bakı-Tbilisi-Ərzurum, Bakı-Tbilisi-Qars, Azəri-Çıraq-Günəşli, TANAP və TAP kimi beynəlxalq layihələrin təşəbbüskarı və mühüm iştirakçısıdır. Bu gün Azərbaycan mədəniyyətlərarası dialoqun, tolerantlığın, multikulturalizmin ünvanıdır. Azərbaycan multikultural və tolerant cəmiyyəti ilə dünya miqyasında nümunəvi ölkədir.

Cari il mayın 25-də Prezident İlham Əliyevin Rusiya Prezidenti Vladimir Putinin dəvəti ilə Moskvaya işgüzar səfər etdiyini xatırladan Masil Dəmirov bu səfər çərçivəsində dövlətimizin başçısının nümayiş etdirdiyi siyasi məharəti Azərbaycan diplomatiyasının yeni uğuru adlandırıb: “Xüsusilə Ali Avrasiya İqtisadi Şurasının geniş tərkibdə iclasını qeyd etmək mütləqdir. Ali Avrasiya İqtisadi Şurasının iclasında Rusiya Prezidentinin dəvəti ilə qonaq qismində iştirak edən Prezident İlham Əliyev çıxışında Ermənistan istisna olmaqla, İqtisadi Birliyin üzvləri ilə Azərbaycanın əməkdaşlığının 30 il ərzində uğurla inkişafını, o cümlədən əmtəə dövriyyəsini, qarşılıqlı ticarətin həcmini, üzv ölkələrin Azərbaycanın xarici ticarət dövriyyəsində payını və əmtəə dövriyyəsinin gələcək artımında böyük potensialın olduğunu qeyd etməklə, ölkəmizin sözügedən ölkələr üçün nə qədər ciddi və etibarlı tərəfdaş olduğunu vurğuladı. Dövlətimizin başçısı siyasi nəzakət nümayiş etdirərək, Azərbaycan ilə Ermənistan arasında münasibətlərin normallaşdırılması üçün ərazi bütövlüyünün və suverenliyin qarşılıqlı şəkildə tanınması əsasında ciddi imkanların olduğunu da vurğuladı. Əlbəttə ki, bu, ilk növbədə, Prezidentin dünya miqyasında kifayət qədər ciddi, sülhsevər və dünyanın ümumi inkişafına töhfə verən lider olduğunu bir daha göstərdi. Ölkəmizin nəqliyyat-logistika infrastrukturu haqqında söz açan Prezident İlham Əliyev Azərbaycanın bu istiqamətdə geniş imkanlarına toxundu, regiondakı önəmli layihələr, o cümlədən Bakı-Tbilisi-Qars dəmir yolu haqqında danışdı. Avropaya, həmçinin Türkiyənin Aralıq dənizi limanlarına çıxışı təmin etməsini, Azərbaycanın “Şimal-Cənub” nəqliyyat dəhlizi layihəsinin fəal iştirakçı olduğunu, ölkənin əsas hissəsini Naxçıvan Muxtar Respublikası ilə birləşdirəcək, həm də beynəlxalq dəmir yolu marşrutlarının bir hissəsi olacaq Zəngəzur dəhlizinin yaradılması təşəbbüsünü irəli sürdüyümüzü tədbir iştirakçılarının nəzərinə çatdırdı və bununla da Azərbaycanın geosiyasi nöqteyi-nəzərdən əhəmiyyətini nümayiş etdirdi”.

Analitik vurğulayıb ki, Ali Avrasiya İqtisadi Şurasının iclası çərçivəsində Ermənistanın baş naziri Nikol Paşinyan diplomatik protokola zidd hərəkət edərək və ümumilikdə ənənəvi siyasi səhvlər silsiləsini nümayiş etdirərək, növbədənkənar söz alıb tədbirin tematikasından kənara çıxdı və növbəti dəfə özünü gülünc vəziyyətə saldı. O çıxışında son illər Ermənistana qarşı “ərazi iddiaları”nın irəli sürülməsinə dair böhtan barədə danışdı, üçtərəfli Bəyanatda təkcə bir dəhliz - Laçın dəhlizi haqqında yazıldığını və bu dəhlizin Azərbaycan tərəfindən qanunsuz olaraq “blokada”landığını dedi. Rusiya Prezidenti Vladimir Putin yüksək qonaqpərvərlik göstərərək dərhal ədalətli mövqe bildirdi və Paşınyanın cavabını verdi. Vladimir Putin və Prezident İlham Əliyev çıxışlarında məhz hələ 1991-ci ildə təsdiq olunmuş sazişlərə uyğun şəkildə müvafiq sərhədlərin tanınması ilə bağlı şəraitin yaradıldığını qeyd etdilər. Bu şərtlər belə bir qənaət hasil etməyə əsas verir ki, Azərbaycanla Ermənistan arasında müvafiq, o cümlədən nəqliyyat kommunikasiyaları üzrə razılaşmalara nail oluna bilər.

“Ermənistana qarşı ərazi iddialarımızın olması barədə ittihamlar səsləndirdiyinə görə Paşinyana layiqli cavab verən Prezident İlham Əliyev bizim belə iddialarımız olmadığını vurğuladı və əlavə olaraq siyasi savadı zəif olan Ermənistanın baş nazirinə sözün əsl mənasında master-klas keçdi. “Dəhliz” sözünü “Şimal-Cənub” dəhlizinə münasibətdə də işlətdiyini bildirən dövlətimizin başçısı bu sözün elə həmin dəqiqliklə “Şərq-Qərb” dəhlizinə münasibətdə də istifadə olunduğunu, “dəhliz” sözünün heç də kiminsə ərazisinə göz dikmək olmadığını izah etdi. Belə bir mötəbər tədbirdə siyasi polemika yaratmağa çalışan Paşinyan nəinki qonağa qarşı, o cümlədən hər bir iştirakçıya qarşı növbəti hörmətsizliyini göstərərək, Ermənistanı beynəlxalq arenada növbəti dəfə fiaskoya uğradığını sübut etdi.

Beləliklə, dövlətimizin başçısı İlham Əliyev uğurlu balanslaşdırılmış və praqmatik xarici siyasət yeritməklə, ölkəmizin dünya miqyasında mövqeyini möhkəmləndirir, eyni zamanda, Azərbaycanı Xəzər-Qafqaz regionunun ən mühüm aktoruna çevirməklə vətəndaşlarımızın təhlükəsiz və xoşbəxt gələcəyini təmin edən xarici və daxili mühit yaradır”, - deyən Masil Dəmirov fikirlərini yekunlaşdırıb.