Bu sözləri braziliyalı “futbol kralı”, dünyada ən çox Pele kimi tanınan Edson Arantes do Nasimentu İTAR-TASS-ın müxbirinə məxsusi müsahibəsində söyləmişdir.

Dünyaşöhrətli sabiq futbolçu yaxın vaxtlarda Moskvaya gələrək, onun adını daşıyan Braziliya qəhvəsinin Rusiya bazarında təbliği kampaniyasında iştirak etmək niyyətindədir.

Pele axırıncı dəfə 1977-ci ildə oynasa da, futbola, öz azarkeşlərinə yenə də sadiq qalır. Bəs, futbol o vaxtdan bəri onun üçün dəyişibmi? Pele bu suala belə cavab vermişdir: “Oyunçuların yeni nəsli gəldikcə, futbol da dəyişir. Bizim dövrümüzdə sürətli hücumlar olurdu, amma oyun ümumən, zənnimcə, daha sərbəst idi. İndi hücumçular da, müdafiəçilər də daha sərt oynayırlar, meydançada bütün oyunçular ciddi nəzarətdə saxlanılır”.

Müasir futbolun keyfiyyətinə gəldikdə, Pele hesab edir ki, “yaxşı oyunçular varsa, futbol da həmişə futbol olaraq qalacaqdır. Amma təəssüf ki, bu gün biz ümumən orta səviyyəli futbol görə bilərik. Problem ondadır ki, indi 4-5 il ərzində daim yaxşı oynamağa qadir futbolçular yoxdur. Futbolçular bir il yaxşı oynayır, sonra isə meydançada baş girləyirlər”.

Pele fransalı Zidanı, braziliyalı Ronaldonu görkəmli oyunçulardan sayır.

Yeri gəlmişkən, Braziliya Futbol Konfederasiyasının məlumatında göstərildiyi kimi, milli yığma komandanın heyətində vurduğu topların sayına görə Peledən sonra ikinci yerdə olan Ronaldo (49 top) “əfsanəvi braziliyalı”nın rekordunu təzələmək niyyətindədir. Pele Braziliya yığma komandasının tarixində onun hələlik yeganə əsas bombardiri olaraq qalır - 97 qol. Xatırladaq ki, Pele özünün 22 illik futbol karyerası ərzində 1360 görüşdə oynayaraq, 1280 top vurmuşdur.