Penitensiar xidmətin rəis müavini: Əfv olunanlar azadlığın dəyərini bilməlidirlər
Bakı, 26 may, AZƏRTAC
Əfv institutunun təməlini Ulu Öndər Heydər Əliyev qoyub və Prezident İlham Əliyev tərəfindən davam etdirilir. Hazırda icra olunan Əfv Sərəncamı 220 şəxsə şamil edilib. Bu sərəncamla 175 şəxs tam azad olunub, 25-nin cəzası yarıya endirilib. Digərləri Probasiya xidmətinin nəzarətində olan şəxslərdir.
AZƏRTAC xəbər verir ki, bu barədə Penitensiar xidmətin rəis müavini, ədliyyə general-mayoru Orxan Qasımov 6 saylı cəzaçəkmə müəssisəsində Əfv Sərəncamının icrası zamanı bildirib.
"Əfv olunanlar azadlığın dəyərini bilməlidirlər. Əfv Sərəncamı bütün cəzaçəkmə müəssisələrində icra edilir. Sərəncam fərdi tətbiq olunur. İndiyədək 71 Əfv Sərəncamına əsasən 10 min şəxs əfv olunub", - deyə o qeyd edib.
Milli Məclisin deputatı Hikmət Babaoğlu Əfv Sərəncamının verilməsini alqışladığını bildirib: "Azərbaycanda humanist dəyərlər həmişə önə çəkilib. Bu Əfv sərəncamları humanizm siyasəti kimi qiymətləndirilməlidir. Azadlığa qovuşanlar humanist aksiyasını layiqincə qiymətləndirməlidirlər. Müstəqillik Günü ərəfəsində Əfv Sərəncamı imzalanıb. Bu, bizim üçün böyük sevincdir", - deyə o bildirib.
Milli Məclisin deputatı Bəhruz Məhərrəmov əfv edilən şəxslərin gənc olduqlarını deyib, onları təbrik edib.
Bölmənin digər xəbərləri
