Politoloq: Prezidentin Çin səfəri Azərbaycanın Avrasiya məkanında diplomatik manevr imkanlarını genişləndirəcək
Bakı, 2 sentyabr, AZƏRTAC
Prezident İlham Əliyevin Çin Xalq Respublikasına (ÇXR) işgüzar səfəri və Şanxay Əməkdaşlıq Təşkilatının (ŞƏT) “ŞƏT plyus” formatında keçirilən Sammitində iştirakı ölkəmizin milli maraqlara əsaslanan çevik və çoxşaxəli xarici siyasətinin növbəti strateji uğuru kimi dəyərləndirilməlidir. Bu səfər yalnız ikitərəfli münasibətlərin inkişafı nöqteyi-nəzərindən deyil, eləcə də Azərbaycanın Avrasiya məkanında artan nüfuzunun və diplomatik manevr imkanlarının genişlənməsinin bariz nümunəsidir.
Bu sözləri AZƏRTAC-a açıqlamasında politoloq Aytən Qurbanova söyləyib.
O bildirib ki, dövlətimizin başçısının səfər çərçivəsində Çinin xarici hərbi müdaxilə və faşizm üzərində Qələbəsinin 80 illiyi münasibətilə keçiriləcək təntənəli tədbirlərdə və hərbi paradda iştirakı Azərbaycan–Çin münasibətlərinin yüksək səviyyədə qarşılıqlı siyasi etimada əsaslandığını bir daha təsdiq edən mühüm məqamdır. Həmçinin bu səfər Azərbaycan–Çin münasibətlərinin strateji tərəfdaşlıq məzmunu ilə zənginləşdiyinin də göstəricisidir. Belə ki, son zamanlarda iki ölkə arasında ticarət dövriyyəsinin sabit artım dinamikası, siyasi dialoqun intensivləşməsi və Azərbaycanın Çinin “Bir kəmər, bir yol” təşəbbüsündə fəal iştirakı ikitərəfli münasibətlərin yeni məzmuna və inkişaf mərhələsinə keçid etdiyini göstərir. Xüsusilə də nəqliyyat-logistika sahəsində əməkdaşlığın genişlənməsi Azərbaycanın Avrasiya məkanında strateji tranzit ölkə rolunu daha da möhkəmləndirir. Digər tərəfdən isə Zəngəzur dəhlizi və Orta Dəhliz kimi irimiqyaslı layihələrin icrası ölkəmizin qlobal ticarət və yükdaşımalar sistemində əvəzolunmaz aktor kimi çıxış etməsinə şərait yaradan mühüm məqamdır.
“Prezident İlham Əliyevin “ŞƏT plyus” Sammitində iştirakı Azərbaycanın Şanxay Əməkdaşlıq Təşkilatı ilə əlaqələrinin daha sistemli şəkildə inkişafına mütləq töhfə verəcək. Bu format müşahidəçi və dialoq tərəfdaşı statusunda olan ölkələr üçün regional təhlükəsizlik, iqtisadi inteqrasiya və enerji təhlükəsizliyi sahələrində fikir mübadiləsində iştirak edərək əməkdaşlıq imkanlarını genişləndirir. Heç şübhəsiz ki, dövlətimizin regional sabitlik və təhlükəsizliyə verdiyi töhfə tərəfdaş dövlətlər tərəfindən də yüksək dəyərləndirilir. Dövlətimizin başçısının rəhbərliyində Azərbaycanın həyata keçirdiyi balanslaşdırılmış və çoxqütblü xarici siyasət kursu ölkəmizə həm Qərb, həm də Şərq dövlətləri ilə qarşılıqlı hörmətə və bərabər hüquqlara əsaslanan münasibətlər qurmaq imkanı yaradıb. Azərbaycanın ŞƏT kimi platformalarda artan fəallığı isə öz növbəsində diplomatik çevikliyin qorunub saxlanmasına, eləcə də ölkəmizin regional və beynəlxalq təşəbbüslərdə fəal iştirakına töhfə verir”, - deyə A.Qurbanova vurğulayıb.
Politoloq əlavə edib ki, Azərbaycan Prezidentinin müdrik və uzaqgörən siyasəti nəticəsində ölkəmizin iqtisadi potensialı, geosiyasi mövqeyi və diplomatik nüfuzu beynəlxalq aləmdə yeni səviyyəyə yüksəlib. İstisnasız olaraq qeyd edə bilərik ki, Azərbaycan sabitlik və təhlükəsizlik məsələlərinə konstruktiv yanaşması ilə beynəlxalq ictimaiyyətin etimadını qazanmış yüksələn gücdür. Ona görə də Prezident İlham Əliyevin Çin Xalq Respublikasına işgüzar səfəri və ŞƏT-in “ŞƏT plyus” formatında keçirilən tədbirdə iştirakı bir daha göstərdi ki, Azərbaycan yalnız regionda deyil, qlobal səviyyədə də sabitlik, təhlükəsizlik və qarşılıqlı faydalı əməkdaşlıq naminə prinsipial mövqe nümayiş etdirən təşəbbüskar və məsuliyyətli dövlət kimi çıxış edir. Bu uğurlu siyasətin əsasında milli maraqlara əsaslanan, beynəlxalq hüquqa sadiq, çoxtərəfli və müstəqil diplomatiya dayanır. Məhz bu strateji yanaşma Azərbaycanın beynəlxalq nüfuzunun daha da möhkəmlənməsinə, diplomatik əlaqələrinin genişlənməsinə və qlobal təşəbbüslərdə ön sırada yer almasına zəmin yaradır.
Bölmənin digər xəbərləri
