Politoloq: Azərbaycan qlobal siyasi güc kimi Gürcüstan üçün vacib əhəmiyyətə malikdir
Bakı, 27 oktyabr, AZƏRTAC
Azərbaycan daim Gürcüstanla əlaqələrə önəm verib. Eyni zamanda, Gürcüstanın Azərbaycana münasibəti də həmişə təqdir olunan formada özünü göstərib. Uzun illər ərzində iki ölkə arasında siyasi mənada hansısa ciddi problemlərin baş verməməyi bir daha sübut edir ki, Cənubi Qafqazda iki qonşu ölkə daim bir-birilərini dəstəkləyirlər. Gürcüstan və Azərbaycan uzun illər separatçılıq təhdidi ilə üzləşib. Bundan başqa, iki ölkənin təkcə siyasi deyil, iqtisadi, mədəni, tarixi əlaqələri də nəzərdən qaçmamalıdır. Prezident İlham Əliyevin Gürcüstan səfərində qonşu ölkəni müttəfiq adlandırmağının qarşı tərəf üçün əhəmiyyəti danılmazdır. Bu gün ölkəmiz regional liderdən qlobal siyasi gücə çevrilib və qonşu ölkə kimi ölkəmizin mövqelərinin güclənməsi Gürcüstan üçün də vacib əhəmiyyətə malikdir. Azərbaycanla Gürcüstan arasında strateji tərəfdaşlıq əlaqələrinin müttəfiqlik səviyyəsinə yüksəlməsi - ikitərəfli layihələrin təkcə ölkələr və region üçün deyil, ümumilikdə Avropa üçün önəmli olduğu faktorunu da özündə ehtiva edir. Azərbaycan Avropanın enerji təhlükəsizliyində mühüm açar rolundakı ölkədir. Gürcüstan və Azərbaycan əlaqələrinin inkişafı bütün Qərb təhlükəsizlik sisteminə də töhfə verir. Ölkələrin qarşılıqlı olaraq bir-birinin ərazi bütövlüyünə dəstəyi, müttəfiqliyi Cənubi Qafqazın gələcək konturlarına müsbət təsirlər edir.
Bu fikirləri AZƏRTAC-a açıqlamasında Sosial Tədqiqatlar Mərkəzinin (STM) sektor müdiri, politoloq Tural İsmayılov söyləyib.
Politoloq qeyd edib ki, Gürcüstan Azərbaycanla Ermənistan arasındakı dialoqlarda mühüm platforma ola bilər. Daha əvvəl Gürcüstanın vasitəçiliyi ilə Ağdamın minalanmış ərazilərinin xəritələri Azərbaycana qaytarılıb. Qonşu ölkə dəfələrlə Azərbaycan və Ermənistan üçün uğurlu vasitəçi kimi təşəbbüslər irəli sürüb. Nəzərə almaq lazımdır ki, Gürcüstan vasitəçiliyi Azərbaycan-Ermənistan dialoq mühitini xeyli inkişaf etdirə bilmək potensialına malikdir. Əgər Ermənistan hansısa qeyri-səmimilik göstərməsə, Gürcüstanın vasitəçiliyinə razılıq versə, Azərbaycan da heç şübhəsiz bu prosesə öz dəstəyini göstərəcək.
Azərbaycan-Gürcüstan iqtisadi əlaqələri cari ilin 9 ayında özünü daha real şəkildə büruzə verdi. Ticarət dövriyyəsinin 1 milyard dollara yaxınlaşması, ölkəmizin bu ölkənin iqtisadiyyatına 3 milyard dollar sərmayə yatırmağı müttəfiqliyin iqtisadi perspektivlərini göstərir. İqtisadi əməkdaşlıq məsələləri üzrə birgə Hökumətlərarası Komissiya 2004-cü ildən etibarən fəaliyyət göstərir. Dəfələrlə iki ölkənin iqtisadi münasibətlərinin dərinləşdirilməsi kontekstində məsləhətləşmələr aparılıb. 2022-ci ilin yanvar-avqust aylarında ikitərəfli ticarət dövriyyəsinin həcmi 520 milyon dollardan çox olub ki, bu, kifayət qədər ciddi rəqəmdir. Həmçinin Ermənistana da bir mesajdır ki, normal qonşuluq münasibətləri olsa, düşdüyü ağır iqtisadi iflasdan xilas ola bilər.
Tural İsmayılovun fikirlərinə görə, regionda qlobal əhəmiyyətli işlər həyata keçirilir. Enerji və nəqliyyat sahəsində yeni layihələr - Avropa İttifaqına qaz ixracının artırılması və 2027-ci ildə 20 milyard kubmetrə çatdırılması önəmli proseslərin bir hissəsini ehtiva edir. Eyni zamanda, elektrik enerjisi ixracının artırılması və işğaldan azad olunmuş ərazilərdə bərpa olunan enerji gücünün 10 gvt, Xəzərdə isə 157 gvt təşkil etməsi, Bakı-Tbilisi-Qars dəmir yolu vasitəsilə yük daşımalarının 5 milyon tona kimi artırılması Cənubi Qafqazın təkcə siyasi yox, iqtisadi baxımdan beynəlxalq münasibətlər sistemindəki yerini nümayiş etdirir.
“Asiyadan Qərbə və əksinə yüklərin artması yeni reallıq yaradır. Azərbaycan Bakı Beynəlxalq Dəniz Ticarət Limanının ötürmə qabiliyyətini 15 milyon tondan 25 milyon tona artırmağı planlaşdırır. Dünyada enerjiyə tələbat artdığı bir zamanda Azərbaycan və Gürcüstan arasında əlaqələr iki ölkənin bir cəbhədə duraraq öz maraqlarını təmin etməsinə imkan verir.
Gürcüstanla Azərbaycanı hər şeydən əvvəl Bakı-Supsa, Bakı-Tbilisi-Ceyhan, Bakı-Tbilisi-Ərzurum və TRASEKA kimi qlobal enerji, nəqliyyat-kommunikasiya layihələri birləşdirir. Bununla paralel olaraq, GUAM, Qara Dəniz İqtisadi Əməkdaşlıq Təşkilatı və digər qurumlar daxilində əməkdaşlıq ikitərəfli strateji əlaqələri daha da möhkəmləndirib: "Azərbaycanda yaşayan gürcülər və Gürcüstanda yaşayan azərbaycanlılar əlaqələrimizin inkişafı üçün çox önəmli rol oynayırlar",- söyləyən dövlətimizin başçısı hər iki dövlətin çoxmillətli, çoxkonfessiyalı ölkələr olduğunu vurğulayıb: "Bu, bizim böyük sərvətimizdir. Ölkələrimizdə yaşayan bütün xalqların nümayəndələri özlərini çox rahat hiss edirlər. Bu, ölkələrimizin bugünkü və gələcək inkişafı üçün çox önəmli amildir". Bütün sahələrdə uğurlu əlaqələr böyük layihələrin reallaşmasına səbəb olur və iki dövlət arasında olan dostluğun təməlini daha da möhkəmləndirir. Prezident İlham Əliyevin qeyd etdiyi kimi: “Bizim bütün sahələr üzrə əməkdaşlığımızda çox böyük perspektivlər, ən əsası isə, güclü siyasi iradəsi var. Gürcüstan və Azərbaycan bundan sonra da bir-birini dəstəkləyəcək. Biz reallaşan layihələri bundan sonra da inkişaf etdirəcəyik və yeni layihələr haqqında düşünəcəyik. Azərbaycan-Gürcüstan əlaqələri Qafqazın geopolitikasında ən güclü müttəfiqliklərdən birini formalaşdıracaq”,-deyə T.İsmayılov vurğulayıb.
Bölmənin digər xəbərləri
