Politoloq: Azərbaycan Soçidə növbəti diplomatik qələbəsini əldə etdi
Bakı, 3 noyabr, AZƏRTAC
Azərbaycan 44 günlük savaşın qalibi kimi regionda şərtləri diktə edən tərəfdir. Təəssüf ki, ölkəmizin artan gücündən narahat olan bəzi siyasi dairələr Ermənistandan yenə də oyuncaq kimi istifadə etməyə çalışır. Qarabağ münaqişəsi artıq mövcud deyil və dövlətimiz bu müharibəni Qələbə ilə yekunlaşdırıb. Bu gün Azərbaycanın ərazi bütövlüyü heç bir qüvvə tərəfindən hər hansı formada şübhə altına alına bilməz. Ölkəmizin bu məsələlərlə bağlı dəqiq və prinsipial yanaşması mövcuddur.
Bu fikirləri AZƏRTAC-a açıqlamasında Sosial Tədqiqatlar Mərkəzinin (STM) sektor müdiri, politoloq Tural İsmayılov söyləyib.
Politoloq qeyd edib: “Ümumiyyətlə, Qarabağda yaşayan əhalinin taleyi haqqında yalnız Azərbaycan dövləti qərar verə bilər. Biz bu gün dünyanın bir çox ölkələrində etnik kimliklərə qarşı sərt siyasi kursun həyata keçirildiyini görürük. Dövlətimizin başçısı dəfələrlə bildirib ki, Qarabağ erməniləri əgər ölkəmizə qarşı terrorda iştirak etməyiblərsə, digər Azərbaycan vətəndaşları kimi rahat yaşaya bilərlər. Azərbaycan nəinki Qafqazda, bütün dünyada ən önəmli multikulturalizm mərkəzlərindən biri halına gəlib. İnsan hüquqlarına və fərqliliklərə dözümsüzlük göstərən Fransa və sair dövlətlərin bu mövzuda bizə nəsə öyrədəcək cəsarəti və siyasi iradəsi yoxdur. Soçi görüşündə də Ermənistanın bütün təxribatları fiaskoya uğradı. Belə ki, görüşdən əvvəl Ermənistanın israrla gündəliyə salmaq istədiyi heç bir məsələyə danışıqlar zamanı toxunulmadı. Əvəzində Azərbaycan öz istədiklərinə nail oldu, irəli sürdüyümüz məsələlər də sənəddə öz əksini tapdı. Sənəddə "Dağlıq Qarabağ" ifadəsi yoxdur, həmçinin ərazi bütövlüyü və sərhəd toxnulumazlığına dair BMT Nizamnaməsinə istinad var. Beləliklə, Azərbaycan-Ermənistan münasibətlərinin normallaşması prosesində Qarabağdan heç kim danışa bilməz. Çünki Qarabağ Azərbaycan ərazisidir və bütün dünya bu reallığı qəbul edib”.
Tural İsmayılov bildirib ki, Prezident İlham Əliyevin “münaqişə artıq bitib” açıqlaması Ermənistan və onun havadarlarına verilən layiqli cavab idi. Belə ki, ölkəmizə qarşı hansısa münaqişə ocaqları yaradaraq təsir etməyə çalışan güclər növbəti dəfə istəklərinə nail olmadılar. Azərbaycan Prezidentinin siyasi iradəsi bütün Qafqaza və dünyaya vacib siyasi reallıqlar bəxş edir. Buna qarşı çıxmaq və Ermənistandan istifadə cəhdləri qəbuledilməzdir.
O əlavə edib ki, Azərbaycan Soçidə bölgədə əsas qurucu və sabitlik tərəfdarı olan güc olduğunu nümayiş etdirdi. Dövlətimiz göstərdi ki, bizim üçün ərazi bütövlüyü ən vacib məsələdir. Necə ki, Azərbaycan digər dövlətlərin ərazi bütövlüyünə hörmət edir, onlar da bunu etməlidirlər.
Ekspertin sözlərinə görə, Ermənistanın özünün səbəb olduğu xaosdan yeganə qurtuluş yolu Azərbaycanla münasibətləri yaxşılaşdırmaqdan keçir.
Bölmənin digər xəbərləri
