Politoloq: Azərbaycan xalqı öz gələcəyini Prezident İlham Əliyev kimi güclü liderə etibar edib
Bakı, 6 iyul, AZƏRTAC
Hər bir dövlət xadimi, siyasi lider və ictimai-siyasi proseslərdə iştirak edən şəxs çalışır ki, cəmiyyətdə mövcud olan aktual məsələlərə münasibət bildirsin, insanların narahatlıq doğuran problemlərini diqqətdə saxlasın, eyni zamanda, onların həlli ilə bağlı konkret fəaliyyət proqramı ortaya qoysun. Əsas məsələ isə yalnız vədlər vermək deyil, cəmiyyətin real gözləntilərinə cavab verən siyasət həyata keçirməkdir.
Bu fikirləri AZƏRTAC-a açıqlamasında politoloq Tofiq Abbasov bildirib.
Onun sözlərinə görə, Prezident İlham Əliyev 2003-cü ildə ilk dəfə dövlət başçısı seçildikdən sonra andiçmə mərasimində Azərbaycanın qarşısında duran bütün əsas problemlərin həlli üçün səylərini əsirgəməyəcəyini, ölkənin ərazi bütövlüyünün bərpasını təmin edəcəyini, vətəndaşların sosial rifahının yüksəldilməsi istiqamətində ardıcıl addımlar atacağını və Azərbaycanı daha güclü dövlətə çevirəcəyini bəyan etmişdi.
“Sonrakı illər göstərdi ki, Prezident İlham Əliyev verdiyi bütün vədləri ardıcıl şəkildə həyata keçirdi. Bunun əsasında isə Ümummilli Lider Heydər Əliyevin yaratdığı möhkəm dövlətçilik təməli dayanırdı. 1993-2003-cü illərdə Heydər Əliyev Azərbaycanın qeyri-müəyyənlik mərhələsindən çıxaraq sabit inkişaf yoluna qədəm qoyması üçün fundamental əsaslar formalaşdırdı, dövlət idarəçiliyini möhkəmləndirdi, açıq və praqmatik xarici siyasətin əsasını yaratdı, ölkənin milli maraqlarının qorunmasını prioritet istiqamət kimi müəyyənləşdirdi. Ümummilli Lider hələ vaxtilə İlham Əliyevin dövlət idarəçiliyi qabiliyyətinə yüksək qiymət verərək bildirmişdi ki, İlham Əliyev hakimiyyətə gələrsə, onun başladığı islahatları uğurla davam etdirəcək. Tarix də göstərdi ki, bu etimad tam doğruldu. Azərbaycan xalqı 2003-cü il prezident seçkilərində İlham Əliyevə məhz Heydər Əliyev siyasi kursunun layiqli davamçısı kimi etimad göstərdi. Eyni zamanda, İlham Əliyev dövlət rəhbəri kimi öz sələfinin kölgəsində qalmadı, əksinə, yaradılmış möhkəm təməl üzərində yeni inkişaf mərhələsini formalaşdıraraq ölkəni daha yüksək səviyyəyə yüksəltməyə nail oldu”, - deyə Tofiq Abbasov vurğulayıb.
Politoloqun sözlərinə görə, istənilən dövlətin xarici siyasətdə qazandığı uğurlar, ilk növbədə, daxildə həyata keçirilən islahatlarla şərtlənir. Azərbaycanın daxili siyasətində aparılan ardıcıl islahatlar, iqtisadi inkişaf və sosial rifahın yüksəldilməsi elə bir mühit formalaşdırdı ki, insanlar dövlət sərvətlərinin və milli imkanların məhz ölkənin inkişafına, vətəndaşların həyat səviyyəsinin yüksəldilməsinə yönəldiyini gördülər. Nəticədə insanlar cəmiyyətin inkişafında daha fəal iştirak etməyə başladılar. Prezident İlham Əliyevin həyata keçirdiyi siyasi kurs məhz bu baxımdan uğurlu idarəçilik modeli formalaşdırdı. Ötən 20 ildən artıq müddətdə Prezident İlham Əliyev cəmiyyətlə daim dialoq quran, insanların problemlərini dinləyən və onlara operativ reaksiya verən lider kimi özünü təsdiqləyib. Onun islahatlara açıq olması, innovativ yanaşmaları dəstəkləməsi, iqtisadi və siyasi idarəçilikdə müasir metodlara üstünlük verməsi bu gün Azərbaycanın əldə etdiyi uğurların əsasını təşkil edir. Təsadüfi deyil ki, Avropa Komissiyasının Prezidenti Ursula Fon der Lyayen də Bakıya son səfəri zamanı Prezident İlham Əliyevin şəxsi liderlik keyfiyyətlərinin regionda formalaşan yeni reallıqlarda mühüm rol oynadığını xüsusi vurğuladı. O qeyd etdi ki, Prezident İlham Əliyev həm sülh gündəliyinin təşəbbüskarı, həm də regionda yeni geosiyasi reallıqların formalaşmasında aparıcı siyasi fiqurdur.
“Bu nəticələrin əsasında dövlətimizin başçısının hadisələrə strateji baxışı, novator yanaşması və milli maraqlara sadiqliyi dayanır. Bu gün Azərbaycanda sabitlik təmin olunub, regionda inteqrasiya proseslərinə mühüm töhfələr verilir, qonşu ölkələrlə və beynəlxalq tərəfdaşlarla qarşılıqlı faydalı əməkdaşlıq inkişaf etdirilir. Azərbaycan həm regional sülhün möhkəmlənməsinə, həm də beynəlxalq ticarət və iqtisadi əməkdaşlığın genişlənməsinə mühüm töhfələr verir. Bu isə onu göstərir ki, seçilmiş siyasi kurs düzgün müəyyənləşdirilib və uğurla həyata keçirilir. Prezident İlham Əliyevin vətənə bağlılığı, milli maraqları hər zaman üstün tutması və gələcəyə hesablanmış strateji baxışı cəmiyyət tərəfindən yüksək qiymətləndirilir. Dövlət idarəçiliyində, iqtisadi və siyasi sahələrdə qarşıya qoyduğu məqsədləri açıq şəkildə ifadə etməsi, onların həyata keçirilməsi istiqamətində ardıcıl fəaliyyət göstərməsi Prezident İlham Əliyevin real vəziyyəti düzgün qiymətləndirən və gələcək hədəfləri dəqiq müəyyənləşdirən lider olduğunu göstərir", - deyə T.Abbasov bildirib.
Politoloq qeyd edib ki, müasir dünyada güclü siyasi liderlərin sayı kifayət qədər azdır. Bu baxımdan Azərbaycan istisna təşkil edən ölkələrdəndir. Azərbaycan xalqı öz gələcəyini Prezident İlham Əliyev kimi güclü liderə etibar edib və yaxşı anlayır ki, milli maraqların qorunması, dövlətin geosiyasi və geoiqtisadi prioritetlərinin həyata keçirilməsi, ölkənin davamlı inkişafı məhz onun rəhbərliyi ilə uğurla təmin olunur. Prezident İlham Əliyevin biliyi, idarəçilik təcrübəsi, siyasi uzaqgörənliyi və qətiyyətli liderlik keyfiyyətləri cəmiyyət tərəfindən yüksək qiymətləndirilir. Məhz buna görə də keçirilən ictimai rəy sorğularında dövlətimizin başçısına göstərilən yüksək etimad tam qanunauyğun və məntiqli nəticə kimi qiymətləndirilməlidir.
Müxbir – Səbinə Əlizadə
Bölmənin digər xəbərləri
