Politoloq: Harada Mehriban Əliyevanın adı var, orada ümid var
Bakı, 12 fevral, AZƏRTAC
Türkiyə ilə qardaşlıq əhdimiz, Türkiyəyə vəfa borcumuz var. O əhd-peyman ki, sonradan bağlanmayıb, süni tellərlə qurulmayıb, eyni candan, eyni qandan, eyni soydan gəlir. O vəfa borcu ki, altında işğal səbəbilə işğalçı Ermənistanın üzünə bağlanan qapılar, illər ərzində beynəlxalq təşkilatlarda Azərbaycana olan dəstək, 44 günlük Vətən müharibəsinin hər günü Türkiyə hökumətindən və xalqından gələn qəti və könüldən dəstək, “Yalnız irəli, mən yanındayam” dayanır. O möhtəşəm Qələbə ki, bu günə qədər Türkiyənin və Azərbaycanın artan gücünü həzm edə bilməyən qüvvələr bu gün Böyük Turan məfhumu ilə barışmağa məcbur edilirlər. Müzəffər Ali Baş Komandan İlham Əliyev heç də təsadüfən deməmişdi ki, Türkiyənin yanımızda qətiyyətli dayanması Cənubi Qafqazda reallaşdırılması hədəflənən məkirli planların önündə sipər oldu. Bu gün biz də Azərbaycan xalqı olaraq sinəmizi Türkiyənin ağrı-acılarının önündə sipər etdik ki, bəlkə bir az da olsa məlhəm ola bilək, bir az da olsa o acıları dindirə bilək. Bu möhtəşəm təşəbbüslə ilk çıxış edən hər zaman olduğu kimi dövlətimizin başçısı, öz möhtəşəm siyasi qərarları kimi humanist əməllərə malik cənab İlham Əliyev və Birinci vitse-prezident Mehriban Əliyeva oldu. Təbii fəlakət yaşanan kimi dövlətimizin başçısı Türkiyə lideri Rəcəb Tayyib Ərdoğana zəng etdi, başsağlığı verərək, Azərbaycan dövlətinin və xalqının hər zaman Türkiyənin yanında olduğunu və olacağını bildirdi. Dövlət başçımızın ətrafında hər zaman yumruq kimi birləşən böyük ürəkli xalqımızın hər bir sosial statusundan olan nümayəndəsi də küçələrə axın etdi, evindən-ocağından, süfrəsindəki çörəyindən, boğazındakı loxmasından qardaşına dərhal pay göndərməyə yollandı. Dünya bir daha Türkiyə-Azərbaycan qardaşlığına, sarsılmaz birliyinə şahidlik etdi. Dünya bir daha türk kişisinin, türk qadının mərhəməti önündə lərzəyə gəldə.
Bu fikirləri AZƏRTAC-a açıqlamasında politoloq Şəbnəm Həsənova söyləyib.
O qeyd edib ki, bütün dünyada Azərbaycan xanımının üzqabığı olan, onun portretinin möhtəşəm əksi Mehriban xanım Əliyevadan analıq, bacılıq, nəciblik, həssasiyyət, insanlıq dərsi aldı. Harada dara düşən insan varsa orada Mehriban xanım Əliyeva ümidi, şəfqəti var, harada Mehriban xanım Əliyevanın adı var orada ümid var. Bu sözlərdə isə böyük məna var. Yarandığı ilk gündən sadəcə daxildə deyil, ölkə xaricində də xeyriyyə işlərinə pionerlik edən, bu nəcib əməllərdə yaxından iştirak edən Heydər Əliyev Fondu bu dəfə də yeni bir axının təməlini qoydu. Bu axın Türkiyə-Azərbaycan qardaşlığında yeni bir səhifənin açılmasına gətirib-çıxartdı. Ümummilli Liderimiz Heydər Əliyevin adını daşıdığı Heydər Əliyev Fondu bu əməldə də Ulu Öndərimizin “Bir millət, iki dövlət” olmaqla bizə miras qoyduğu bütün vəsiyyətlərinə sadiq olduğunu göstərdi. Bir daha sübut olundu ki, Mehriban xanım Əliyeva Ümummilli Liderimizin irsinin qorunmasına sadiq olduğu qədər, bu nəcib təşəbbüslə bu irsi indiki və gələcək nəsillərə aşılayır. 44 günlük Vətən savaşı zamanı Mehriban xanım Əliyevanın xalqa nəcib hər müraciəti idi Azərbaycan qadınını ayaqda tutan! Müzəffər Ali Baş Komandan İlham Əliyevin “Dəmir yumruğu” idi Azərbaycanın Qələbəsini təmin edən! Mehriban xanım Əliyevanın “Mən sizin kimi qardaşlarımla fəxr edirəm” həssas münasibəti idi mərd Azərbaycan oğlunu Qələbəyə inandıran! Bu gün şəhid ailələrinə, qazilərimizə olan dövlət qayğısı qədər, Türkiyəyə edilən dəstəyin ən ali səviyyədə olmasıdır Azərbaycan xalqının minnətdarlıq duyduğu!
Vurğulayıb ki, Mustafa Kemal Atatürk “Azərbaycanın sevinci bizim sevincimiz, kədəri bizim kədərimizdir” deyib. Bu gün bütün Azərbaycan xalqının ürəyi Türkiyə ilə döyündüyü kimi xalqımızın hər bir nümayəndəsi uçqunların altından çıxan hər cana sevinir, hər itkiyə üzülür, gözyaşı tökür. Biz fəxr edirik ki, xilasetmə işlərində bizim mərd oğullarımız böyük şücəat göstərir, qardaşlarına ikinci can verirlər. Allah bütün dünyasını dəyişənlərə rəhmət eləsin, yaralılar şəfa tapsın. Türkiyə bu sınaqdan da üzüağ çıxacaq. Bu periodda da biz bir-birimizin əlini buraxmayacağıq. Çünki Türkiyə-Azərbaycan qardaşlığı əbədidir, sarsılmazdır!
Bölmənin digər xəbərləri
