Bakı, 27 dekabr, AZƏRTAC

Qərbi Azərbaycan İcmasının binasının açılışını və Prezident İlham Əliyevin Qərbi Azərbaycan barədə çıxışını dövlətimizin gələcək siyasi məqsədinin əsas hədəflərindən biri kimi qiymətləndirmək olar. Bilirik ki, həmin bina Qarabağın azərbaycanlı icmasına məxsus olub. İndi isə Qərbi Azərbaycan İcmasının istifadəsinə verildi. Bu, o deməkdir ki, dövlət Qarabağla bağlı planlarını həyata keçirdi, növbəti məqsəd Qərbi azərbaycanlıların öz tarixi torpaqlarına qayıdışına nail olmaqdır. Bu, Azərbaycan dövləti və xalqı üçün yeni tarixi mərhələnin başlanması deməkdir.

Bu fikirləri AZƏRTAC-a açıqlamasında Ana Vətən Partiyası sədrinin müavini, politoloq Yalçın Hacızadə söyləyib.

Politoloq bildirib ki, Qarabağın azərbaycanlı icması kimi Qərbi Azərbaycan İcması da müəyyən müddətdən sonra öz fəaliyyətini tarixi torpaqlarımızda yerləşən mərkəzlərində həyata keçirəcəklər. 2010-cu ildə Dağlıq Qarabağın azərbaycanlı icmasının mərkəzi qərargahının açılışında Prezident İlham Əliyev çıxışında demişdi: “Qısa müddət ərzində bütün təmir-tikinti işləri aparılmışdır və bina ilə tanışlıq çox gözəl təəssürat bağışlayır. Ancaq bu da həqiqətdir ki, bu, sizin üçün müvəqqəti bir qərargahdır. Torpaqlarımız işğalçılardan azad olunandan sonra sizin üçün yeni gözəl binalar Dağlıq Qarabağda tikiləcəkdir”.

“Qərbi Azərbaycan İcmasının nümayəndələri ilə görüşdüyü gün dövlətimizin başçısının doğum günü idi. Prezidentimiz torpaqlarımız işğalda olan müddətdə öz doğum günlərini qaçqın və köçkünlərlə keçirərdi, daha sonra işğaldan azad olunmuş rayonlarımızda həmin rayonların sakinləri ilə keçirirdi. İndi isə Qərbi azərbaycanlılarla. Əlbəttə, bu yanaşmanın özünün böyük siyasi anlamı var”, - deyə Y.Hacızadə diqqətə çatdırıb.

Onun sözlərinə görə, böyük rəqabət şəraitində dünyada yeni siyasi sistem formalaşdırılır. Həmçinin regionumuzda da yeni siyasi şərait formalaşıb. Azərbaycan dövləti də bütün bunların aktiv iştirakçısı olmaqla tarixi ədalətsizliyi aradan qaldırmalıdır. Heç bir hüquqi və siyasi əsası olmadan Qərbi Azərbaycan torpaqları bizdən alınaraq ermənilərə verilib. Yüz minlərlə azərbaycanlı öz tarixi torpaqlarından didərgin salınıb. Tarixi və mədəni abidələrimiz məhv edilib. Qərbi Zəngəzurun bizdən alınması ilə Naxçıvan və qardaş Türkiyə ilə birbaşa əlaqəmiz kəsildi. Eyni zamanda, Türkiyənin Mərkəzi Asiyanın türk ölkələri ilə əlaqələri qırıldı. Bütün bunlar bizim istəyimizlə yox, zəifliyimizdən istifadə edərək edildi. İndi keçən əsrin əvvəllərində mövcud vəziyyətdən fərqli olaraq bu gün öz məqsədlərinə çata biləcək güclü müstəqil dövlətimiz və siyasi liderimiz var. Ona görə dövlət və xalq olaraq Qərbi Azərbaycan amalı uğrunda birliyimizi qorumalı, iradəmizi gücləndirməli, Prezident İlham Əliyevin bu istiqamətdə müəyyənləşdirdiyi siyasi xətti əsas tutaraq fəaliyyətimizi daha da artırmalıyıq.