POLŞA PREZİDENTİ LEX KAÇİNSKİNİN ÇIXIŞI
-Hörmətli cənab prezidentlər!
Hörmətli Baş nazir!
Hörmətli xanımlar və cənablar!
Mən hər şeydən əvvəl istərdim ki, bizi Bakıda çox qonaqpərvərliklə qarşıladıqlarına görə təşəkkürümü bildirim. Bu ölkəyə ikinci dəfədir səfər edirəm. Mən cənab Prezident Əliyevə və digər prezidentlərə, nümayəndə heyətlərinə təşəkkür etmək istəyirəm.
Polşa üçün bu təşkilatla əməkdaşlıq çox böyük əhəmiyyət kəsb edir. Belə ki, bu təşkilat artıq bir sıra müvəffəqiyyətlərə nail olmuşdur. Bu, Demokratiya və İqtisadi İnkişaf Uğrunda Təşkilat adlanır. Keçmişdə bir sıra illər ərzində bu regionda demokratiya mövcud olmamışdır. Amma hazırda onu yaratmaq mümkün olmuşdur və yaradılır. Bizim ölkəmiz isə bu regionda demokratiyanın bərqərar olmasında çox maraqlıdır.
Dünən GUAM-Polşa danışıqları keçirilmişdir. Bu, çox vacib bir təşəbbüs idi. Biz GUAM-a üzv olan bütün dövlətlərlə və bir təşkilat kimi GUAM-ın özü ilə əməkdaşlıq etmək istəyirik. Bu təşkilat artıq 10 ildir fəaliyyət göstərir. Cənab Saakaşvilinin bildirdiyi kimi, bu, əvvəllər qrup kimi yaradılmış, daha sonra isə siyasi bir quruma çevrilmişdir. Elə bir quruma ki, o, maraq doğurur, yəni dünyanın ABŞ, Yaponiya kimi güclü dövlətlərinin marağına səbəb olur. Eyni zamanda, Polşa və Litva kimi ölkələrin də marağına səbəb olur. Biz əksər hallarda Litva Prezidenti ilə birgə fəaliyyət göstəririk.
Burada enerji sahəsi ilə bağlı danışıldı və biz bu planı həyata keçirməyə başlayırıq. Bu məsələ əvvəllər bizə qeyri-real görünürdü. Amma indi artıq reallaşıbdır. Bu, bizi olduqca sevindirir.
Eyni zamanda, biz istərdik ki, boru kəməri Brodıdan Qdanska uzansın. Bizim tərəfimizdən bunu həyata keçirmək üçün hansısa xüsusi səylər lazım deyildir, yəni sadəcə, neft lazımdır. Neft isə bildiyiniz kimi, GUAM ərazisində, Azərbaycanda var. Əlbəttə, bunun üçün Gürcüstana və Ukraynaya da ehtiyacımız vardır. Çünki bu nefti hansısa marşrutla aparıb çatdırmaq lazımdır. Ona görə də enerji layihələrinin çox böyük önəmi vardır. Xüsusilə müasir dünyada bu, çox böyük əhəmiyyət kəsb edir. Çünki enerji böhranı, enerji şantajları baş vermişdir və arzulayırıq ki, bunlar gələcəkdə bir daha baş verməsin.
Gələcəkdə bizi çox böyük perspektiv gözləyir. GUAM ölkələri bu perspektivi nəzərdən keçirir. Bu, NATO ilə, Avropa qurumları ilə əməkdaşlığa dair perspektivlərdir. Polşa, Litva və mənə elə gəlir, digər ölkələr də bu fikrə qoşular ki, onlar bu nöqteyi-nəzərdən Avropa İttifaqına üzv olan ölkələr arasında ən etibarlı tərəfdaşa çevrilmək istəyirlər və istiqamətverici rol oynayırlar. Biz bu səyləri dəstəkləyirik. Bizim təcrübəmiz də o qədər çox deyildir. Amma bu işdə ardıcıl olmaq, doğrudan da, müsbət nəticələr əldə etməyə gətirib çıxarır. Bir neçə ay ərzində hansısa bir nəticəni müşahidə etmək mümkün deyildir. Buna nail olunduğu zaman isə vəziyyət daha da yaxşılaşır.
GUAM ölkələri həm NATO, həm də Avropa İttifaqı üçün böyük əhəmiyyət kəsb edir. Çünki onlarda çox böyük enerji resursları vardır və bu resurslar Avropa İttifaqında ya yoxdur, yaxud da onların həcmi olduqca azdır. Mədəni baxımdan Avropa İttifaqının çox böyük əhəmiyyəti vardır. Hesab edirik ki, birləşən Avropa birgə dəyərlər məkanıdır, insan hüquqlarının, demokratiyanın bərqərar olduğu bir məkandır.
Əlbəttə, burada rəqabətin olması da vacibdir. İnteqrasiya daha çox mədəni tarazlıq yaradır. Ona görə Polşa bu istiqamətdə sizin etibarlı müttəfiqiniz və tərəf müqabilinizdir.
Mən təkrar etmək istəmirəm. Əlbəttə, enerji sahəsində fəaliyyət göstərmək, əməkdaşlıq etmək hamımız üçün çox maraqlıdır. Polşa həm alıcı, həm də tranzit əraziyə malik ölkə kimi bütün fəaliyyətlərdə olduqca maraqlıdır. Amma siyasi əməkdaşlıq da bizi olduqca çox maraqlandırır. Çünki son bir il yarım ərzində biz yüksək nailiyyətlər əldə etmişik və inanıram ki, növbəti görüşümüzə qədər bunların sayı çoxalacaqdır.
Cənab Prezident Əliyev, GUAM-ın sədri kimi, bu təşkilata sədrlik edən ölkə kimi Sizi bir daha təbrik etmək istəyirəm. Çünki mən GUAM-ın görüşlərində ilk dəfə deyil, iştirak edirəm. Burada bir sıra yeni təşəbbüslər səslənir. Əlbəttə, Avropada belə təşəbbüslərin sayı çoxdur. Mən onları burada səsləndirmək istəmirəm. Amma heç bir təşkilat sizin təşkilat kimi yüksək nəticə əldə edə bilməmişdir. Onlardan heç biri daimi katiblik yarada bilməmiş, belə dinamikaya malik olmamışdır. Ona görə hörmətli prezidentlər, sizin hamınıza müraciət edərək deyirəm ki, öz ölkələrinizlə qürur duya bilərsiniz. Sizə təşəkkür edirəm. Amma üzr istəyirəm ki, indi bu sammiti tərk etmək məcburiyyətində olacağam. Çünki bir neçə saatdan sonra Avropa İttifaqında çox vacib bir tədbir başlayır. Son hazırlıq işləri gedir.
Bizi yüksək qonaqpərvərliklə qarşıladığınıza və bu sammiti yüksək səviyyədə təşkil etdiyinizə görə bir daha dərin təşəkkürümü bildirirəm.
Bölmənin digər xəbərləri
