Azərbaycan Respublikasının Prezidenti İlham Əliyev noyabrın 7-də Prezident sarayında Milli Məclisə seçkilərlə bağlı Azərbaycan televiziyasına müsahibə vermişdir. AZƏRTAC həmin müsahibənin mətnini oxuculara təqdim edir.

- Möhtərəm cənab Prezident, Azərbaycan Respublikasının Milli Məclisinə seçkilər başa çatdı. İlk növbədə, seçkiqabağı vəziyyətlə bağlı Sizin fikirlərinizi bilmək istərdik.

- Bilirsiniz ki, bir neçə ay bundan əvvəl, mayın 11-də Azərbaycanda seçkilərin demokratik keçirilməsi üçün mənim tərəfimdən Sərəncam imzalanmışdır. Sərəncama əsasən, Azərbaycanda seçki praktikasının təkmilləşdirilməsi məsələləri öz həllini tapmalı idi. O vaxt ümid edirdim və bu gün görürəm ki, bizim ümidlərimiz həyatda öz əksini tapıbdır. Seçki Məcəlləsi ilə bərabər, mənim tərəfimdən imzalanmış Sərəncam Azərbaycanda demokratik seçkilərin keçirilməsi üçün lazımi şərait yaratdı. Müxtəlif yeniliklər oldu, Azərbaycanın praktikasında əvvəllər olmayan yeniliklər seçkilərin və seçki prosesinin normal keçirilməsinə şərait yaratdı.

Bildiyiniz kimi, qeydiyyat məsələlərində heç bir problem olmamışdır. 2 mindən çox namizəd qeydiyyatdan keçmişdi. Ondan sonra təbliğat-təşviqat kampaniyası da uğurlu idi. Bütün namizədlərə bərabər şərait yaradılmışdı. Həm seçicilərlə görüşlər keçirilirdi, həm də müxtəlif televiziya kanallarında, o cümlədən dövlət televiziyasında və İctimai televiziyada pulsuz və pullu efir vaxtları verilirdi. Yəni bir sözlə, seçki kampaniyasının normal aparılması üçün hər bir namizədə şərait yaradılmışdı və hərə öz imkanlarından istifadə etdi.

Bütün bunlara baxmayaraq, seçkilərə təxminən 10 gün qalmış mənim tərəfimdən növbəti Sərəncam imzalandı. Bildiyiniz kimi, biz seçkilərin demokratik keçirilməsi üçün beynəlxalq təşkilatlarla çox səmərəli işləyirik və onların tövsiyəsi ilə bir neçə əlavə addım da atıldı. O cümlədən barmaqların görünməyən mürəkkəblə işarələnməsi məsələsi də öz əksini tapmışdır. Mən buna da getdim, bunu da etdim ki, son şübhələr də aradan qalxsın. Beləliklə, seçkilərin normal, ədalətli keçirilməsi üçün bütün şərait yaradılmışdı. Seçki günü də bütövlükdə çox sakit keçdi, seçkilər azad, ədalətli şəkildə keçirildi. Azərbaycan seçicilərinin, demək olar ki, təxminən yarısı seçkilərdə iştirak etmiş və öz iradəsini açıq şəkildə ifadə etmişdir. Bütövlükdə, seçki prosesi, seçkilərə qədər dövr uğurlu idi. Hesab edirəm ki, seçki günü də uğurlu olmuş və Azərbaycanda normal, demokratik seçkilərin keçirilməsi mümkün olmuşdur.

- Cənab Prezident, bəs seçkilərin nəticəsini necə qiymətləndirirsiniz?

- Mən nəticəni də müsbət qiymətləndirirəm. Həmişə deyirdim, bu gün də deyirəm, əsas məsələ ondadır ki, Azərbaycan xalqının iradəsi seçkilərin nəticələrində öz əksini tapsın. Seçkilərin ilkin nəticələri bunu deməyə əsas verir. Ümumi ab-hava çox müsbət idi və nəticə onu göstərir ki, Azərbaycan xalqı şəffaf şəkildə, azad şəkildə istədiyi namizədə səs verdi və ən layiqli namizədlər də seçiliblər. Yenə demək istəyirəm ki, seçkilərin normal keçirilməsi üçün bütün şərait yaradılmışdı, çoxsaylı xarici müşahidəçilər seçkiləri müşahidə edirdilər, minlərlə yerli müşahidəçi seçkiləri müşahidə edirdilər. Bütövlükdə, nəticələr Azərbaycan xalqının iradəsini tam əks etdirir. Mənim üçün çox sevindirici hal o oldu ki, Yeni Azərbaycan Partiyasının nümayəndələri seçkilərdə çox uğurlu iştirak etmişlər və qələbə qazanmışlar. Eyni zamanda, digər siyasi spektrin nümayəndələri, o cümlədən bitərəf namizədlər seçkilərdə gözəl nəticələr göstərmişlər. Seçkilər Azərbaycanın demokratik inkişafı üçün çox böyük əhəmiyyət kəsb edir. Ona görə biz seçkilərə çox böyük diqqətlə yanaşırdıq və bu diqqət seçkilərin normal keçirilməsində öz əksini tapmışdır.

Ancaq bununla yanaşı, əldə edilmiş bəzi məlumatlara görə, seçki günü müəyyən qanun pozuntuları da oldu. Bir neçə dairədə, mənə verilən məlumata görə haradasa, 7-8 dairədə qanun pozuntuları olmuşdur. İndi bu qanun pozuntuları araşdırılır. Prokurorluğa müvafiq göstəriş verilmişdir ki, bu qanun pozuntuları ciddi şəkildə araşdırılsın. Harada ki, vəzifədən sui-istifadə halları olubdur, orada insanlar inzibati məsuliyyətə cəlb ediləcəklər. Harada ki, cinayət xarakterli hallar olubdur, orada təbii ki, bunu törətmiş insanlar cinayət məsuliyyətinə cəlb olunmalıdırlar və cəlb olunacaqlar. Bir neçə ay ərzində biz seçkilərin normal keçirilməsi üçün əlimizdən gələni etdik və sadaladığım məqamlar, məsələlər bir də onu göstərir ki, Azərbaycan iqtidarının və onun Prezidentinin niyyəti seçkiləri ədalətli şəkildə keçirməkdən ibarət olmuşdur. Ona görə mən imkan verə bilmərəm ki, hansısa məmur özbaşınalığına görə, hansısa qanunsuz müdaxiləyə görə, seçkilərin ümumi nəticələrinə zərbə dəysin.

Mən yenə də qeyd etmək istəyirəm ki, belə hallar çox azlıq təşkil edir. Bizdə 7-8 dairə barədə narahatedici məlumatlar var. Qalan dairələrdə, - yəni haradasa, 115 dairədə və bəlkə ondan da çox, - seçkilərin nəticələri heç bir şübhə doğurmur. Onu da əlavə etmək istəyirəm ki, bildiyiniz kimi, seçkilərdə yeni bir yenilik ondan ibarət idi ki, exit-poll nəzərdə tutulmuşdu. Bunu müxtəlif təşkilatlar, o cümlədən Amerikanın “PA Government” şirkəti keçirirdi. Bu gün mən onların nəticələrinə internetdə baxdım və gördüm ki, o nəticələr demək olar ki, Mərkəzi Seçki Komissiyasının ilkin nəticələri ilə 90 faiz üst-üstə düşür. Yəni bu onu göstərir ki, real nəticələr exit-polla da təsdiqlənir. Bu bir də onu göstərir ki, Azərbaycanda seçkilər şəffaf keçirildi və seçki prosesinə müdaxilələr çox az oldu. Amma oldu, bu da, əlbəttə ki, bizi narahat edir. Digər tərəfdən, əlbəttə, seçki praktikasının təkmilləşdirilməsi məsələsi bir Sərəncamla, yaxud da ki, bir seçki kampaniyası ilə həll olunan məsələ deyildir. Buna müəyyən vaxt lazımdır. Amma o da şübhə doğurmur ki, bütün görülən işlər seçkilərin normal şəraitdə keçirilməsinə imkan yaradırdı.

Bütövlükdə, seçkilərin nəticələri tam əksər hallarda Azərbaycan xalqının iradəsini əks etdirmişdir. O hallarda ki, qanun pozuntusu olub, əlbəttə, bu məsələlər araşdırılacaq və dediyim kimi, prokurorluq ciddi tədbirlər görəcəkdir.

Bildiyiniz kimi, beynəlxalq müşahidəçilər missiyası da öz ilkin rəyini artıq təqdim edibdir. Biz bu rəyi təhlil edəcəyik. Biz beynəlxalq təşkilatlarla uzun illərdir ki, çox səmərəli şəkildə əməkdaşlıq edirik. Onların rəyi bizim üçün vacibdir. Biz bir neçə ay ərzində, seçkilər ərəfəsində Avropa Şurası, ATƏT və digər beynəlxalq təşkilatlarla, insan hüquqları ilə məşğul olan beynəlxalq təsisatlarla çox səmərəli, işgüzar şəkildə işləmişik. Ümid edirik ki, bu əməkdaşlıq bundan sonra da davam edəcəkdir. Ona görə onların da rəyi, əlbəttə, nəzərə alınacaq və ilkin hesabatda əks olunan məqamlar ciddi şəkildə təhlil ediləcək və ciddi ölçülər götürüləcəkdir. Mən seçkilərin normal, ədalətli keçirilməsi ilə əlaqədar bir daha bütün Azərbaycan xalqını təbrik etmək istəyirəm. Hamımız bu son aylar ərzində seçkilərin necə keçəcəyi haqda düşünürdük. O cümlədən və bəlkə də, ilk növbədə mən. Çünki seçkilərin normal, ədalətli keçirilməsi mənim Prezident kimi gələcək fəaliyyətimə də böyük dəstək olacaqdır.

Mən seçkilərin uğurlu keçiriləcəyinə şübhə etmirdim və bütün beynəlxalq rəy sorğuları da onu göstərirdi ki, Yeni Azərbaycan Partiyasının nümayəndələri, o cümlədən iqtidarı dəstəkləyən digər nümayəndələr daha şanslıdırlar. Bunu həm Azərbaycanda keçirilmiş rəy sorğuları göstərdi, həm də məşhur beynəlxalq təşkilatların rəy sorğuları göstərirdi. Seçkilərin nəticəsi bu fikri əyani şəkildə təsdiqlədi. Ona görə seçkilərin demokratik şəkildə keçirilməsi Azərbaycanın qarşısında yeni imkanlar açır, yeni üfüqlər açır. Biz bundan sonra da demokratikləşmə prosesinə böyük diqqət göstərəcəyik. Azərbaycanda siyasi proseslərin sürətlənməsi, demokratik inkişafın möhkəmlənməsi ölkəmizin hərtərəfli inkişafı üçün çox böyük əhəmiyyət kəsb edir. Mən dəfələrlə qeyd etmişdim, bu gün də demək istəyirəm ki, bizim gözəl iqtisadi nailiyyətlərimiz, uğurlarımız, gələcək iqtisadi perspektivlərimiz bilavasitə Azərbaycanda demokratiyanın inkişafı ilə bağlıdır. Azərbaycanda vətəndaş cəmiyyətinin yaranması, azad cəmiyyətin yaranması bizim başlıca vəzifəmizdir.

Ona görə Prezident kimi mən çox şadam və məmnunam ki, bu mərhələ də uğurla başa çatdı. Azərbaycan xalqı seçkilərdə öz sözünü dedi, istədiyi namizədə açıq, ədalətli, azad şəkildə səs verdi. Beləliklə, Azərbaycan öz demokratik inkişafında yeni mərhələyə qədəm qoydu. Ümid edirəm ki, yeni seçilən parlament və parlamentin deputatları Azərbaycanın demokratik inkişafı üçün əlindən gələni edəcəklər və ölkəmiz daha da sürətlə inkişaf edəcək və güclü dövlətə çevriləcəkdir.