SİYASƏT
Prezident İlham Əliyev Şuşadan beynəlxalq dairələrə qətiyyətli mesajlar verdi
Bakı, 5 may, AZƏRTAC
Azərbaycan Prezidenti İlham Əliyev Şuşada keçirilən beynəlxalq konfransda çıxışı zamanı ölkəmizin haqlı mövqeyini bir daha dünya ictimaiyyətinə çatdırdı və beynəlxalq dairələrə qətiyyətli mesajlar verdi.
Bunu AZƏRTAC-a açıqlamasında siyasi şərhçi Sahil Kərimli deyib.
S.Kərimli bildirib ki, dövlətimizin başçısı xüsusilə Ermənistanla Azərbaycan arasında aparılan sülh danışıqları prosesinə toxundu, rəsmi Bakının prinsipial mövqeyini lazımi ünvanlara çatdırdı. “Təəssüflə vurğulamaq lazımdır ki, Ermənistan hələ də danışıqlar masasında qeyri-konstruktiv mövqe nümayiş etdirir, Azərbaycanla sülh müqaviləsi imzalamaqdan boyun qaçırır. Beynəlxalq dairələr, sülh prosesinə töhfə verməyə çalışan ölkələr təcili olaraq Ermənistana ciddi təzyiqlər göstərməlidir. Çünki əgər vasitəçilik missiyası ilə çıxış edən tərəflər Cənubi Qafqazda sülh və təhlükəsizliyin təmin edilməsində həqiqətən də maraqlıdırlarsa, bu zaman Ermənistanı sülhə məcbur etməlidirlər. Ermənistan rəhbərliyi sülhə gəlməzsə, bölgədə gərginlik davam edəcək”, - deyə siyasi şərhçi diqqətə çatdırıb.
Azərbaycanla sülh müqaviləsinin imzalanmasının, ilk növbədə, Ermənistana lazım olduğunu qeyd edən S.Kərimli deyib ki, ABŞ-da Azərbaycan və Ermənistan xarici işlər nazirləri arasında aparılan danışıqlarla bağlı hələlik nikbin fikir söyləmək mümkün deyil. Son günlər Ermənistan cəmiyyətində və mətbuatında müxtəlif təxribatçı və pozucu manipulyasiyalara rast gəlinir. Görünən odur ki, Ermənistan tərəfi yenə öz ampluasındadır.
“Əminliklə demək olar ki, Ermənistanın mövqeyi onun çətin dalana dirənməsi ilə nəticələnəcək. Çünki istər hərbi, istərsə də siyasi tərəfdən Azərbaycan ondan qat-qat güclüdür. Fakt odur ki, Ermənistan 44 günlük acı məğlubiyyətə düçar olandan bu günə qədər heç nəyə nail ola bilməyib. Azərbaycan isə hərbi və siyasi cəhətdən istədiyinə nail olub. Prezident İlham Əliyevin də vurğuladığı kimi, Ermənistan sülh istəmirsə, sülh olmayacaq. İrəvan sülh istəmirsə, növbəti hərbi təxribatlara hazırlaşırsa, həmişə olduğu kimi, yenə də Azərbaycanın öldürücü zərbəsi ilə üzləşəcək”, - deyə Sahil Kərimli vurğulayıb.
Siyasi ekspert əlavə edib ki, Azərbaycanın bölgədə yaratdığı yeni reallıqlar dünyanın bütün siyasi dairələri tərəfindən qəbul olunur. Ermənistan isə bilərəkdən bu reallıqlardan uzaq mövqe tutur.