Putin bildirib ki, “Oreşnik”in kütləvi tətbiqi nüvə silahı zərbəsinin gücünə bərabər olacaq
Moskva, 28 noyabr, AZƏRTAC
“Oreşnik” hipersəs zərbəli raket sistemi dərin və yaxşı qorunan obyektləri vurmağa qadirdir.
AZƏRTAC xəbər verir ki, bunu Rusiya Prezidenti Vladimir Putin Astanada Kollektiv Təhlükəsizlik Müqaviləsi Təşkilatının (KTMT) iclasında çıxışı zamanı deyib.
Rusiya Prezidenti qeyd edib ki, “Oreşnik”dən kütləvi şəkildə istifadə olunarsa, zərbənin gücü nüvə silahının gücü ilə müqayisə oluna bilər. O əlavə edib ki, Rusiya Federasiyası artıq “Oreşnik”in kütləvi istehsalına başlayıb.
Putinin dediyi kimi, Rusiyanın “Oreşnik”ə bənzər daha bir neçə istifadəyə hazır sistemləri var.
Rusiya Prezidentinin sözlərinə görə, Rusiya Federasiyası bütün NATO ölkələrinin birgə istehsalından 10 dəfə çox raket istehsal edir və hasilatı dörddəbir artıracaq. Rusiya Federasiyasının rəhbəri söz verib ki, onun ölkəsində başqa yeni raket sistemləri də peyda ola bilər.
Putin bildirib ki, Baş Qərargah və ölkənin Müdafiə Nazirliyi hazırda Ukrayna ərazisində “Oreşnik” tərəfindən məhv edilmək üçün hədəflər seçir və Kiyevdəki qərar qəbuletmə mərkəzləri məhvetmə hədəfinə çevrilə bilər.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
