QAÇQIN VƏ MƏCBURİ KÖÇKÜN AİLƏLƏRİN UŞAQLARI ÜÇÜN YAY DÜŞƏRGƏLƏRİ TƏŞKİL EDİLİR
AZƏRTAC-a daxil olmuş məlumatda bildirilir ki, Cəmiyyət, Beynəlxalq Qırmızı Xaç Komitəsinin dəstəyi ilə Sabirabadda məskunlaşan qaçqın və məcburi köçkün ailələrin uşaqları üçün Zuğulba uşaq sanatoriyasında düşərgə təşkil etmişdir.
İki ay ərzində düşərgədə 150 məcburi köçkün və aztəminatlı uşaqlar istirahət edəcəklər. Beynəlxalq Qırmızı Xaç Komitəsinin nümayəndələri burada uşaqlara baş çəkəcək və onlara müxtəlif hədiyyələr və məktəb ləvazimatları verəcəklər.
Qızıl Aypara Cəmiyyəti Əzizbəyov rayonunun Şaqan qəsəbəsində yerləşən əlil uşaqlar üçün də 3 saylı internatda düşərgə təşkil etmişdir. Düşərgəyə Azərbaycan Qızıl Aypara Cəmiyyətinin, Norveçin Qızıl Xaç və “NORDMİSJONEN” təşkilatlarının könüllüləri cəlb edilmiş, 230 uşaq üçün müxtəlif əyləncələr təşkil olunmuşdur.
Düşərgə Qızıl Aypara Cəmiyyyəti, “Statoyl” neft şirkəti, Beynəlxalq Qırmızı Xaç və Qızıl Aypara Cəmiyyətləri Federasiyasının maliyyə dəstəyi ilə təşkil edilmişdir.
