Qadın voleybolçulardan ibarət millimizin üzvləri üçün Yaponiyada ziyafət təşkil olunub
Bakı, 24 sentyabr, AZƏRTAC
Yaponiyanın Senday şəhərinin meri burada təlim-məşq toplanışında olan və dünya çempionatında iştirak edəcək qadın voleybolçulardan ibarət Azərbaycan, İtaliya milli komandaları və hər iki ölkənin səfirləri üçün ziyafət təşkil edib.
Azərbaycan Voleybol Federasiyasından AZƏRTAC-a bildiriblər ki, ziyafətdə ölkəmizin Yaponiyadakı səfirinin müşaviri Fərid Talıbov və milli komandamızın baş məşqçisi Faiq Qarayev çıxış ediblər.
Faiq Qarayev bildirib ki, dünya çempionatında iştirak etmək böyük uğurdur. Ölkəmizdə idmana böyük diqqət, qayğı var və burda olmağımız da bu diqqətin nəticəsidir.
Yüksək təşkilatçılığa görə təşəkkürünü bildirən Fərid Talıbov deyib: “Dünya çempionatında iştirak etdiyi üçün millimizi və xalqımızı təbrik edirəm. Bu, böyük nəticədir. Çempionatın başlamasına artıq sayılı günlər qalıb. Komandamıza uğurlar arzu edirəm”.
Qeyd edək ki, millimiz sentyabrın 25-26-da İtaliya komandası ilə yoldaşlıq görüşləri keçirəcək. Dünya çempionatı isə sentyabrın 29-da start götürəcək. Millimiz çempionatda Rusiya, ABŞ, Tailand, Trinidad və Tobaqo və Koreya Respublikası yığmaları ilə bir qrupda mübarizə aparacaq.
Bölmənin digər xəbərləri
