QAFQAZ MÜSƏLMANLARI İDARƏSİNİN SƏDRİ VATİKAN ORDENİNƏ LAYİQ GÖRÜLMÜŞDÜR
Vatikan dövlətinin Azərbaycandakı apostol nunsisi Klaudio Qucerotti Roma Papası XVI Benediktin şeyxülislam hacı Allahşükür Paşazadəyə ən səmimi arzular diləyən məktubunu oxudu və Müqəddəs Böyük Qreqori ordenini ona təqdim etdi.
K.Qucerotti sonra çıxış edərək dedi:
- Biz şeyxülislamın fəaliyyətini yüksək qiymətləndiririk. Onun xidmətləri, dini dözümlülüyü Azərbaycana səfəri zamanı mərhum Roma Papası II İohann Pavelə böyük təsir göstərmişdi. Qərbdə mənəviyyatı və əxlaqı pozğun olan bəzi adamların əməlləri nəticəsində bu gün biz kədərli hadisələrlə qarşılaşmışıq. Təəssüflər olsun ki, Qərbdə heç bir hüquqi və dini normaya sığmayan karikaturalar yayılmışdır. Biz istəyirik bütün müsəlmanlar bilsinlər ki, Vatikan dövləti bu fakta dərhal yazılı şəkildə münasibətini bildirmiş və onu qətiyyətlə pisləmişdir. Hamımız üçün vacib olan belə bir məqamda İtaliya mətbuatında kardinalla müsahibə dərc olunmuşdur. O bildirmişdir ki, insanın şərəfinə toxunulanda məhkəməyə müraciət etmək olar, lakin dinin alçaldılmasına görə məhkəmə yoxdur. Biz hesab edirik ki, dini dəyərlər ən ali dəyərlərdir.
“Dinlərarası dialoq uzun illər ərzində qurulmuşdur. Biz kiminsə bütün bunları məhv etməsinə yol verə bilmərik. Biz şeyxin fəaliyyətini, Azərbaycandakı konfessiyalar və icmalar arasındakı qarşılıqlı anlaşmanı və həmrəyliyi görürük. Ona görə də Roma Papası məhz indi mənə Vatikanın ali mükafatını – Müqəddəs Böyük Qreqori ordenini şeyxə təqdim etməyi həvalə etmişdir. Şeyxin həyat yolu və gördüyü işlər doğrudur. Bu, eyni zamanda katolik kilsəsinin xəttidir”.
K.Qucerotti ölkəmizdə sülh, qardaşlıq və dözümlülük naminə gördüyü işlərə görə dini idarənin başçısına minnətdarlığını bildirərək dedi ki, dünyanın digər dini liderləri də Azərbaycanın dini xəttini dəstəkləyir və bəyənirlər.
Qafqaz Müsəlmanları İdarəsinin sədri şeyxülislam hacı Allahşükür Paşazadə yüksək mükafata görə minnətdarlığını bildirərək dedi:
- Biz çox şadıq ki, ölkəmizdə dini dözümlülüyün olması onun hüdudlarından kənarda da məlumdur. Bu, o deməkdir ki, biz doğru yoldayıq. Bu xətt ümummilli liderimiz Heydər Əliyev tərəfindən müəyyən olunmuş və bizə vəsiyyət edilmişdir. Bu gün onun davamçısı Prezident İlham Əliyev dini konfessiyaların dinc yanaşı yaşaması və inkişaf etməsi üçün əlindən gələni edir. Sevindirici haldır ki, iqtisadiyyatımızın inkişafı ilə xalqımızın mənəviyyatı da yüksəlir. Dini xəttimiz digər konfessiyaların liderləri tərəfindən bəyənilir. Roma Papası, Rusiya və Gürcüstan patriarxları və digər dini liderlərlə görüşlərimiz buna dəlalət edir. Zənnimcə, karikaturalar dini münaqişə olmayıb, daha çox siyasi oyun və dini savadsızlıqdır. Məncə, biz münaqişələrin həllinin yeni yollarını axtarmalı, dialoqu davam etdirməliyik. Mənim katolik ordeni ilə təltif olunmağım göstərir ki, bizim aramızda dini münaqişə yoxdur. Bu mükafatı Azərbaycan xalqının tolerantlığına sülhpərvərliyinə, hökumətimizin xəttinin doğruluğuna verilən yüksək qiymət hesab edirəm.
Ordenin təqdim olunması mərasimində Bakı və Xəzəryanı bölgənin yepiskopu Aleksandr ata, Dağ yəhudiləri icmasının sədri Semyon İxiilov, Avropa yəhudiləri icmasının başçısı Gennadi Zelmanoviç, Xilaskar İsa Bakı katolik kilsəsinin baş keşişi Yan ata, kütləvi informasiya vasitələrinin nümayəndələri iştirak etmişlər.
