“Qalatasaray” UEFA Çempionlar Liqasında tarixi seriyaya imza atıb
Bakı, 23 oktyabr, AZƏRTAC
Ötən gecə Norveçin "Budyo Qlimt" klubuna 3:1 hesabı ilə qalib gələn Türkiyənin “Qalatasaray” komandası UEFA Çempionlar Liqasının əsas mərhələsində tarixi seriyaya imza atıb.
AZƏRTAC xəbər verir ki, İstanbul nəhəngi 2012-ci ilin dekabrından bəri ilk dəfə qitənin ən nüfuzlu klub turnirində ardıcıl iki oyunu qalibiyyətlə başa vurub. Həmin mövsümdə komanda ardıcıl üç qələbə əldə etmişdi.
Superliqa təmsilçisinin nigeriyalı hücumçusu Viktor Osimhen bu uğurda əsas pay sahibi olub. O, avrokuboklarda ardıcıl 7 matçda qol vuran ilk “Qalatasaray” futbolçusu olub. Bu göstərici ilə forvard 2012/2013-cü illər mövsümündə 6 ardıcıl oyunda qol vuran Burak Yılmazın rekordunu yeniləyib. Bundan əlavə, Osimhen klub tarixində ÇL-da qarşılaşmanın birinci hissəsində iki dəfə fərqlənən ilk futbolçu kimi də yadda qalıb.
Qeyd edək ki, Türkiyə klubu ötən tur evdə İngiltərə "Liverpul"una minimal hesabla qalib gəlib.
Bölmənin digər xəbərləri
