“Qan yaddaşımız” sənədli-publisistik filminin təqdimatı olmuşdur
Bakı, 21 fevral (AZƏRTAC). Fevralın 21-də Beynəlxalq Mətbuat Mərkəzində “Qan yaddaşımız” sənədli-publisistik filmi Milli Məclisin deputatlarına, təhsil işçilərinə və ictimaiyyətin nümayəndələrinə təqdim olunmuşdur.
AZƏRTAC xəbər verir ki, “Qan yaddaşımız” filmi Azərbaycan həqiqətlərini ilk dəfə dövlət səviyyəsində beynəlxalq kürsülərdə səsləndirən ümummilli lider Heydər Əliyevin əziz xatirəsinə ithaf olunmuşdur.
Erməni yalanlarını sənədlərin dili ilə ifşa edən filmin müəllifləri Əməkdar İncəsənət Xadimi, aktyor və rejissor Əbdül Mahmudbəyov, tanınmış yazarlar Baba Vəziroğlu və İlham Tumas, aparıcısı isə Şəmistan Əlizamanlıdır.
Filmdə Azərbaycanın tarixi torpaqlarında xarici havadarlarının köməyi ilə özlərinə dövlət qurmuş ermənilərin yalançı əməlləri və saxtakarlıqları arxiv materialları əsasında, tutarlı tarixi faktlarla təkzib olunur.
Eyni zamanda, kökü çox qədimlərə gedən erməni terrorunun artaraq sistemli xarakter aldığı və azərbaycanlılara qarşı acı faciələr və soyqırımlarla nəticələndiyi diqqətə çatdırılır. Göstərilir ki, ermənilərin Azərbaycan xalqına qarşı 1905-1907, 1918-1920, 1948-1953, 1988-1994-cü illərdə həyata keçirdikləri deportasiya və soyqırımları, əhalinin milli mənşəyinə görə məhv edilməsi sonda torpaqlarımızın işğalı ilə nəticələnmişdir. Bu isə beynəlxalq təşkilatların müəyyən etdiyi soyqırımı (genosid) anlamına tamamən uyğun gəlir.
Bundan əlavə, vaxtilə erməni-bolşevik birliyinin Bakıda, Qubada, Şamaxıda və s. törətdiyi mart qırğınları da filmdə terrorizm aksiyaları kimi səciyyələndirilir.
Bölmənin digər xəbərləri
