QAN YADDAŞI
QANLI YANVAR HADİSƏLƏRİ MURMANSKDA DA XATIRLANIR
Bakı, 13 yanvar (AZƏRTAC). Murmansk sakinləri 1990-cı il yanvarın 20-də Bakıda baş vermiş qanlı hadisələri xatırlayırlar.
Rusiyanın bu şəhərindən azərbaycanlı jurnalist Əlihüseyn Şükürov xəbər verir ki, Ümumrusiya Azərbaycanlıları Konqresi Murmansk bölməsinin ofisində Qara Yanvar hadisələrinin 20 illiyi ilə əlaqədar fotostendlər, kitab sərgiləri təşkil ediləcəkdir. Elə orada anma mərasimi keçiriləcəkdir. Ümumrusiya Azərbaycanlıları Konqresi Murmansk bölməsi tərəfindən 20 Yanvar faciəsi ilə əlaqədar tədbirlər planı hazırlanmışdır. Yanvarın 20-də şəhidlərin ruhuna dualar oxunacaq, Bakıda baş vermiş qanlı hadisələrdən bəhs edən sənədli filmlər göstəriləcək, azərbaycanlı sahibkara məxsus “Çinar” restoranında ehsan veriləcəkdir.
1990-cı il yanvar hadisələri ilə əlaqədar keçiriləcək tədbirlərdə jurnalistlər, Murmansk vilayəti bələdiyyə və hökumət orqanlarının işçiləri, habelə müxtəlif milli icmaların nümayəndələri iştirak edəcəklər.