Qanun pozucuları meşə gözətçisinə xəsarət yetiriblər
Bakı, 4 dekabr, AZƏRTAC
Ekologiya və Təbii Sərvətlər Nazirliyinin Cəlilabad Meşə Mühafizəsi və Bərpası Müəssisəsinin Cəlilabad meşəbəyliyinin 4 saylı dolayının meşə gözətçisi Əfqan Abıyev meşə ərazisində qanunsuz olaraq ağac kəsən bir qrup şəxs tərəfindən döyülüb və ona ağır bədən xəsarətləri yetirilib.
Nazirliyin mətbuat xidmətindən AZƏRTAC-a bildirilib ki, meşə gözətçisi mühafizə etdiyi meşə sahəsində bir neçə şəxsi ağac kəsərkən yaxalayıb, onlara meşədən qanunsuz ağac kəsdiklərini və buna görə məsuliyyət daşıdıqlarını izah edib. Ə.Abıyev onlar barəsində qanunauyğun tədbir görmək istəyən zaman qanun pozucuları meşə gözətçisinin qanuni tələblərinə məhəl qoymayıb, əksinə onu təhqir edib və fiziki təzyiqlər göstərməklə ağır bədən xəsarətləri yetirərək hadisə yerindən qaçıblar.
Ağır bədən xəsarətləri alan meşə gözətçisi xəstəxanaya yerləşdirilib. İlkin müayinə zamanı onun qabırğasının çatladığı, bədəninin bir neçə yerində əzilmələr olduğu müəyyən edilib. Hazırda o, xəstəxanada həkim nəzarəti altında müalicə olunur.
Faktla bağlı rayon polis şöbəsinə məlumat verilib və müəyyən edilib ki, meşə gözətçisinə xidməti vəzifəsini icra edərkən ağır bədən xəsarətləri yetirənlər rayonun Musalı kənd sakinləri Cavid İsfəndiyar oğlu Muradov, Şəmu Yavər oğlu Muradov, Şəhram Abasəli oğlu Həsənovdur.
Qeyd edək ki, nazirliyin əməkdaşlarına qarşı bu cür insidentlər dəfələrlə baş verib, meşələrin mühafizəsi zamanı meşə işçiləri ayrı-ayrı şəxslərin ciddi müqavimətləri, fiziki təzyiqləri ilə üzləşib.
Meşələrə qanunsuz müdaxilələrin qarşısı meşə işçilərinin həyatı bahasına alınır, xeyli sayda təbiət mühafizəçisi fiziki təzyiqlərə məruz qalaraq yaşıllıqların, ətraf mühitin qorunmasında fədakarlıq göstərir.
Bölmənin digər xəbərləri
