Qanunsuz ağac qırıntısına qarşı mübarizə gücləndirilir
Bakı, 19 oktyabr (AZƏRTAC). Ekologiya və Təbii Sərvətlər Nazirliyinin müvafiq qurumları tərəfindən özbaşına ağac kəsilməsi hallarına qarşı intensiv mübarizə aparılır.
Nazirliyin mətbuat xidmətindən AZƏRTAC-a bildirmişlər ki, son illərdə meşələrin bərpası və mühafizəsi sahəsində həyata keçirilən məqsədyönlü tədbirlərin, o cümlədən qanunsuz ağac qırıntısına qarşı mübarizənin gücləndirilməsi öz müsbət nəticəsini verməkdədir. Meşələri mal-qaradan qorumaq məqsədi ilə çəpərləmə işlərinin aparılması nəticəsində milyonlarla ağac pöhrəsi əmələ gəlmişdir. Habelə açıq sahələrdə tinglərin əkilməsi hesabına meşə ilə örtülü ərazilərin sahəsi 11,4 faizdən 11,8 faizə çatmışdır.
Eyni zamanda, ötən il meşə qanunvericiliyinin pozulması ilə əlaqədar 363 fakta görə sənədlər hüquq-mühafizə orqanlarına göndərilmiş, vəzifə borclarını layiqincə icra etməyən 136 meşə mühafizəçisi vəzifədən azad edilmiş və 243 nəfər barəsində müxtəlif intizam-tənbeh tədbirləri görülmüşdür.
Bundan başqa, Azərbaycan meşələrindən xammal kimi istifadə hallarının qarşısının alınması nəticəsində ağac emalı ilə məşğul olan fiziki və hüquqi şəxslərin idxal etdiyi ağac və ağac məhsullarının miqdarı 2002-ci ilə nisbətən 4,5 dəfə artmışdır.
Bölmənin digər xəbərləri
