Qanunsuz ov edən paytaxt sakinləri saxlanılıblar
Bakı, 24 fevral, AZƏRTAC
Ekologiya və Təbii Sərvətlər Nazirliyinin aidiyyəti qurumlarının əməkdaşları tərəfindən “Ovçuluq haqqında” Azərbaycan Respublikası Qanununun tələblərinə əməl olunması vəziyyətinin araşdırılması məqsədilə ölkə ərazisində fevralın 21-dən 24-dək növbəti reydlər keçirilib.
Nazirliyin mətbuat xidmətindən AZƏRTAC-a verilən məlumata görə, reyd zamanı Qaradağ rayonu ərazisində qanunsuz ov edən Bakı şəhər sakinləri Ehtiram Məcidov, Rövşən Əliyev və Vaqif Quliyevdən 3 ov tüfəngi və 34 patron götürülüb. Qanun pozucularının hər biri 1000 manat məbləğində cərimə olunub.
Həmin ərazidə növbəti reyd zamanı isə qanunsuz ov edən 2 nəfər naməlum şəxs saxlanılaraq onlardan 2 ov tüfəngi və 249 patron götürülüb.
Masallı rayonunun Qızılağac kəndi ərazisində isə qanunsuz ovla məşğul olan naməlum şəxslərdən 1 ov tüfəngi, 28 patron və 3 ovlanmış quş götürülərək barələrində qanunamüfaviq qaydada akt tərtib olunub.
Sənəd təqdim etməyən qanun pozucularının şəxsiyyətinin müəyyən edilməsi və barələrində qanunvericiliyə uyğun tədbir görülməsi üçün aidiyyəti polis şöbələrinə müraciət edilib.
İlisu Dövlət Təbiət Qoruğunun ərazisində qanunsuz ov edən Qax şəhər sakini Xeyirbəy Ramazanov saxlanılaraq ondan 2 ov tüfəngi götürülüb. Faktla bağlı akt və protokol tərtib olunaraq qanun pozucusu 1000 manat məbləğində cərimə edilib.
Reydlər davam etdirilir.
Bölmənin digər xəbərləri
