Qanunsuz ovlanmış balıqların satışı ilə məşğul olanlar saxlanılıblar
Bakı, 16 fevral, AZƏRTAC
Qanunsuz balıq ovunun və qeyri-qanuni əldə edilmiş ov məhsullarının satışının qarşısının alınması məqsədilə Dövlət Ekoloji Təhlükəsizlik Xidmətinin və Su Nəqliyyatında Polis İdarəsinin əməkdaşları tərəfindən keçirilən birgə nəzarət tədbirləri zamanı Sumqayıt, Siyəzən və Xudatda qanunsuz ovlanmış balıqların satışı ilə məşğul olanlar saxlanılıblar.
Xidmət rəsmisi Bəhruz Məhəmmədov AZƏRTAC-a bildirib ki, araşdırma zamanı qanun pozucularının Siyəzən rayon sakinləri Əbülfəz Mirzəyev, Vüqar Əsgərov, Şabran şəhər sakini Həkim Məsimov, Xudat şəhər sakini Ramil Ağamalıyev, Sumqayıt şəhər sakinləri Yaqub Dadaşov, Elvin Həsənov, Kamal Ədilov və Rasim Məhərrəmov olduğu müəyyən edilib. Faktlarla bağlı təqsirkarlar barəsində protokol tərtib olunub və qanunamüvafiq tədbirlər görülüb.
Xidmət rəsmisinin sözlərinə görə, ölkə ərazisində qanunsuz balıq ovunun və satışının qarşısını almaq məqsədilə keçirilən nəzarət tədbirləri davam etdirilir.
Bölmənin digər xəbərləri
