QARA ŞƏHƏRİN YERİNDƏ – YENİ MÜASİR MƏRKƏZ
Bakı, 5 iyul (AZƏRTAC). Azərbaycan Respublikasının Prezidenti İlham Əliyevin “Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün kompleks tədbirlər planı”nın təsdiq edilməsi haqqında Sərəncamının icrası çərçivəsində, Bakı Şəhər İcra Hakimiyyətinin başçısı H.Abutalıbovun 2007-ci il tarixli 11 iyun sərəncamına əsasən, bundan sonra Bakı Ağ Şəhər (Baku White City) adlanacaq Qara Şəhərin bərpa və inkişafı haqqında qərar qəbul edilmişdi. Sahəsi 221 hektar olan bu ərazi, şəhərin müasir mərkəzi kimi bir anlayışı tamamilə dəyişərək və genişləndirərək, yeni bir sima alacaqdır.
AZƏRTAC xəbər verir ki, Bakı Ağ Şəhər layihəsinin Baş planı öz sakinlərinə yaşayış, iş, istirahət və əyləncələr üçün ən yaxşı şərait təqdim edəcəyi şəhər tipli 10 universal məhəllənin yaradılmasını nəzərdə tutur.
Bakı Şəhər İcra Hakimiyyətinin sərəncamına əsasən, Bakı buxtasının lap mərkəzində yerləşən və paytaxtımızın mirvarisi sayılan Bakı Bulvarının abadlaşdırılması və genişləndirilməsi planlaşdırılır. Bakı əhalisinin ən çox sevdiyi küçələrdən biri olan Neftçilər prospekti isə Yeni Bulvar boyu davam edəcəkdir.
Bakının müasir mərkəzi həm də şəhər nəqliyyatının yeni şəbəkəsinin yaradılması sayəsində universal olacaqdır. Belə ki, məsələn, burada Bakı Ağ Şəhərinin mərkəzi meydanına çıxışı olan metro stansiyasının inşa olunması, habelə avtobus nəqliyyatı şəbəkəsinin inkişaf etdirilməsi nəzərdə tutulmuşdur. Bütün sahil boyu tramvay xəttinin çəkilməsi də planlaşdırılır. Habelə, su nəqliyyatından istifadə edilməsi üçün, bütün Bulvar xətti boyu dəniz yolunun salınması da nəzərdə tutulmuşdur.
Bakı Ağ Şəhərinin infrastruktur kommunikasiyalarının işçi layihələri işlənib hazırlanmış və layihənin həyata keçirilməsi prosesinə cəlb edilmiş “Azəryolservis”, “Bakelektrikşəbəkə”, “Azəriqaz”, “Aztelekom” və s. müvafiq dövlət təşkilatları ilə razılaşdırılmışdır.
Paytaxtımızda yeni müasir mərkəzin yaradılması yerli və əcnəbi sərmayəçilərin cəlb edilməsi üçün əlavə imkanlar da açır. Bu məqsədlə, sərmayəçilər üçün xüsusi şərtlər nəzərdə tutulmuşdur.
Azərbaycan Prezidentinin Fərmanı çərçivəsində, Bakı Şəhər İcra Hakimiyyətinin sərəncamına əsasən, hazırda Bakı Ağ Şəhərinin ərazisində, çirklənmiş torpaqların təmizlənməsi üçün “Ecol Engineering Services” (ARDNŞ) tərəfindən xüsusi tədbirlər həyata keçirilir.
Bakı Ağ Şəhər layihəsi üzərində işləmək üçün, azərbaycanlı mütəxəssislərlə yanaşı, mühəndis dizaynı sahəsində ixtisaslaşan “Atkins” (Böyük Britaniya) şirkətindən əlavə, “Foster + Рartners” və “F+A Architects” kimi məşhur memarlıq firmaları da cəlb edilmişlər.
Qeyd edək ki, “Atkins” şirkəti memarlıq və mühəndis layihələndirilməsi ilə məşğul olur. 1938-ci ildə təsis olunduğu gündən bu günə kimi şirkət dünyanın 200 ölkəsində yüksək təsir bağışlayan layihələr yaratmış və həyata keçirmişdir. Onun ən məşhur layihəsi - Burj-Al-Arab - Ginnesin rekordlar kitabına daxil edilmiş, dənizdə inşa olunmuş ən hündür hoteldir.
Norman Foster “Foster + Рartners” şirkətinin təsisçisi və başçısıdır. 1967-ci ildə əsası qoyulmuş bu şirkət hazırda, 20-dən artıq ölkədə emalatxanalara malik olmaqla, dünya səviyyəsində məşhur praktikaya malikdir. Berlində Reyxstaqın yenidən qurulması, Honqkonqda Honqkonq və Şanxay Bankı, Frankfurtda “Kommersbank” və Saynsberidə, Noric, Təsviri incəsənət mərkəzi kimi rəngarəng layihələri ilə Foster beynəlxalq səviyyədə tanınmışdır. Öz fəaliyyətinə başladığı andan şirkət artıq özünün mahir ustalığına görə 400-dən artıq müxtəlif mükafat və fərman almış və 65-dən artıq beynəlxalq və milli müsabiqənin qalibi olmuşdur.
1973-cü ildə əsası qoyulmuş “F+A Architects” Amerika memarlıq bürosu, tikinti işləri aparılmamış ərazilərdə pərakəndə ticarət obyektləri yaratmaqla, habelə ticarət müəssisələrinin yerləşdiyi zəif inkişaf etmiş zonaları yenidən qurmaqla və dirçəltməklə aparıcı mövqeyə çıxmışdır. “F+A Architects”, həmçinin kommersiya təyinatlı obyektlərin layihələndirilməsi ilə məşhurdur.
######
Bölmənin digər xəbərləri
