“Qarabağ”ın futbolçusu: Juninyo Braziliya çempionatında özünü sübut etmək üçün çox motivasiyalıdır
Bakı, 22 yanvar, AZƏRTAC
“Juninyodan Braziliya çempionatında ən yaxşısını gözləmək olar”.
AZƏRTAC xəbər verir ki, bu sözləri "Qarabağ"ın braziliyalı futbolçusu Julio Romao keçmiş komanda yoldaşı Juninyonun "Flamenqo" klubuna keçidi barədə ölkəsinin mətbuatına açıqlamasında deyib.
O bildirib ki, 28 yaşlı forvardın əsas xüsusiyyəti rəqib müdafiəçilərin arxasına sürətlə qaçmasıdır: “Juninyonun rəqibdən topu almaq və hücum etmək kimi üstünlüyü var. Həm sağ, həm də sol ayağı ilə yaxşı oynamağı bacarır. Bir sözlə, ən böyük silahı sürətidir”.
Romaonun sözlərinə görə, “Flamenqo” kimi komandada təzyiqin çox olması normaldır: "Juninyo debüt və “Flamenqo”ya layiq futbolçu olduğunu sübut etmək üçün çox motivasiyalıdır”.
Yarımmüdafiəçi Azərbaycan və Braziliya futbolunu da müqayisə edib: “Braziliyada azarkeşlər tərəfindən böyük təzyiq olur. Azərbaycanda isə belə şey yoxdur. Sadəcə, baş məşqçimiz Qurban Qurbanov çox tələbkardır. Bakıda sakit həyat tərzimiz var. Məğlub olduğumuz matçlardan sonra çölə çıxdığımız zaman insanlar bizə və ailəmizə yaxınlaşıb, oyunlarla bağlı fikir və irad bildirmirlər”.
Qeyd edək ki, “Qarabağ” Juninyonun keçidindən 5 milyon avro qazanc əldə edib. O, Ağdam təmsilçisinin heyətində 80 oyunda 42 qol və 4 məhsuldar ötürmə ilə yadda qalıb.
Bölmənin digər xəbərləri
