QAN YADDAŞI
QARADAĞ RAYONUNDA 20 YANVAR FACİƏSİNİN 20-Cİ İLDÖNÜMÜNƏ DAİR TƏDBİRLƏR PLANI İCRA OLUNUR
Bakı, 14 yanvar (AZƏRTAC). Qaradağ Rayon İcra Hakimiyyətindən (RİH) verilən məlumata görə, rayonda 20 Yanvar ümumxalq hüzn gününün iyirminci ildönümü ilə bağlı hazırlanmış tədbirlər planı icra olunur.
İdarə, müəssisə və təşkilatlarda 20 Yanvar gününün Azərbaycanın azadlığı, müstəqilliyi və ərazi bütövlüyü uğrunda qəhrəmanlıq rəmzi kimi qeyd edilməsi ilə əlaqədar xatirə tədbirləri keçirilir. Yanvarın 17-də 20 Yanvar şəhidi Azad Rzayevin qəbri ziyarət ediləcək, yanvarın 19-da Ə.Əmirov adına NQÇİ-nin mədəniyyət sarayında ümumrayon xatirə mərasimi keçiriləcəkdir. Elə həmin gün bütün tədris ocaqlarında ilk dərslər Qanlı Yanvar faciəsinə həsr olunacaqdır. Bunlardan əlavə, mədəniyyət və tədris müəssisələrində anım gecələrinin keçirilməsi, stendlərin və rəsm sərgilərinin təşkil edilməsi, məscidlərdə şəhidlərin ruhuna duaların oxunması, “Qaradağ” qəzetində faciənin iyirminci ildönümü ilə bağlı materialların dərc olunması və s. nəzərdə tutulmuşdur.
Faciənin ildönümü ərəfəsində RİH-də keçiriləcək görüşdə ərazidə yaşayan 20 Yanvar əlillərinə və bir şəhid ailəsinə maddi yardım ediləcəkdir.
Yanvarın 20-də ictimaiyyətin nümayəndələri Şəhidlər xiyabanını ziyarət edəcək, matəm əlaməti olaraq dövlət bayraqları endiriləcək, saat 12.00-da rayonun ərazisində şəhidlərin xatirəsi bir dəqiqəlik sükutla yad ediləcəkdir.