“Qardaşlaşmış Qarabağ Məktəbləri” layihəsi çərçivəsində növbəti düşərgənin açılışı olub
Bakı, 23 dekabr, AZƏRTAC
Daxili İşlər Nazirliyinin “Xəzri” istirahət və sağlamlıq mərkəzində III “Qardaşlaşmış Qarabağ Məktəbləri” qış düşərgəsi açılıb.
Diasporla İş üzrə Dövlət Komitəsindən AZƏRTAC-a bildirilib ki, açılış mərasimində əvvəlcə Azərbaycan torpaqlarının bütövlüyü uğrunda canından keçən igid oğullarımızın əziz xatirəsi bir dəqiqəlik sükutla yad edilib. Sonra Azərbaycanın Dövlət Himni səsləndirilib.
Çıxış edən Azərbaycan Diasporuna Dəstək Fondunun (ADDF) icraçı direktoru Əkrəm Abdullayev tədbirin əhəmiyyətini vurğulayıb.
"ZƏFƏR" Şəhid Ailələrinə Dəstək İctimai Birliyinin rəhbəri Sevinc Alızadə belə bir təşəbbüs üçün Fondun rəhbərliyinə və təşkilatçılara təşəkkürünü bildirib.
Daha sonra Milli Məclisin deputatları Ceyhun Məmmədov, Bəhruz Məhərrəmov, Fatma Yıldırım, Jalə Əhmədova, Qazaxıstan Respublikası Türkistan vilayəti “Qarabağ” Azərbaycan Etno-Mədəniyyət Mərkəzinin rəhbəri Ramilə Mustafayeva çıxış edərək düşərgənin işinə uğurlar arzulayıblar.
Tədbirdə Diasporla İş üzrə Dövlət Komitəsi tərəfindən hazırlanan 44 günlük Vətən savaşına həsr olunmuş videoçarx və “Qardaşlaşmış Qarabağ Məktəbləri” layihəsi çərçivəsində keçirilmiş öncəki düşərgənin videoçarxı nümayiş olunub.
Qeyd edək ki, Azərbaycan Diasporuna Dəstək Fondunun və "ZƏFƏR" Şəhid Ailələrinə Dəstək İctimai Birliyinin birgə təşkilatçılığı, Daxili İşlər Nazirliyinin “Xəzri” istirahət və sağlamlıq mərkəzinin tərəfdaşlığı ilə dekabrın 21-27-də baş tutacaq düşərgədə Qazaxıstanda fəaliyyət göstərən həftəsonu “Qarabağ məktəbi”nin şagirdləri ilə Azərbaycanın ərazi bütövlüyünün bərpası zamanı müxtəlif vaxtlarda şəhid olmuş qəhrəmanlarımızın övladları iştirak edəcəklər. Layihəyə Qazaxıstandan və Azərbaycandan ümumilikdə 20 şagird, 3 təlimçi qatılıb. “Heydər Əliyev İli” çərçivəsində Azərbaycan Diasporuna Dəstək Fondu və "ZƏFƏR" Şəhid Ailələrinə Dəstək İctimai Birliyi tərəfindən həyata keçirilən layihə Ümummilli Liderin əziz xatirəsinə həsr olunub.
Qeyd edək ki, bu layihənin icrasına ötən ildən başlanılıb. Layihə çərçivəsində İsveçrədə fəaliyyət göstərən həftəsonu məktəbinin şagirdləri ilə məcburi köçkün və şəhid ailələrinin övladları 2022-ci il iyulun 18-24-də Bakının Xəzər rayonunun Şüvəlan qəsəbəsində yerləşən “Cırtdan” Respublika Uşaq İstirahət və Sağlamlıq Mərkəzində təlimlər keçiblər. 2023-cü il avqustun 7-13-də isə düşərgənin 2-ci hissəsi İsveçrədə baş tutub. Düşərgənin növbəti mərhələsinin Qazaxıstanda keçirilməsi planlaşdırılır.
Bu layihə Prezident İlham Əliyevin ölkəmizin mədəniyyət paytaxtı Şuşada keçirilmiş Dünya Azərbaycanlılarının Zəfər (V) Qurultayında çıxışı zamanı həftəsonu məktəblərinin açılması istiqamətində fəaliyyətin gücləndirilməsi, bütün Azərbaycan vətəndaşlarını birləşdirən ana dilinin daim təbliğ olunması tövsiyələri çərçivəsində gerçəkləşdirilir.
Xatırladaq ki, Birinci vitse-prezident Mehriban xanım Əliyevanın təşəbbüsü və tapşırığı ilə xarici ölkələrdə həftəsonu Azərbaycan məktəbləri yaradılıb. Bu məktəblərin məqsədi azərbaycanlı uşaqlara ana dilini, ədəbiyyatını, tarixini, mədəniyyətini tədris etməklə yanaşı, milli kimliklərini qoruyub saxlamaq və ölkəmizlə bağlı həqiqətləri aşılamaqdır.
Bölmənin digər xəbərləri
