Qaxda akademik Zərifə Əliyevanın xatirəsi anılıb
Qax, 24 aprel, AZƏRTAC
Akademik Zərifə Əliyeva Azərbaycan qadınına xas yüksək humanizmi, həssaslığı, əxlaqi dəyərləri, insanpərvərlik keyfiyyətlərini, təşəbbüskarlığı parlaq şəxsiyyətində cəmləşdirən, respublika qadın hərəkatının önündə gedən nüfuzlu ziyalılardan biri olub. O, müasir tariximizə əbədi həkk olunan mənalı ömür yaşayıb, fədakar əməyi, çalışqanlığı, tədqiqatçılıq əzmi ilə tibb elminin ən uca pillələrinə ucalıb, yorulmaz fəaliyyəti ilə insanlara daim nur bəxş edib, gözlərə işıq verib. Akademik Zərifə Əliyevanın parlaq siması göz önündə həm də qayğıkeş, sədaqətli həyat yoldaşı, mehriban ana, nəcib qadın kimi canlanır.
AZƏRTAC-ın bölgə müxbiri xəbər verir ki, bu fikirlər akademik Zərifə Əliyevanın anadan olmasının 103-cü ildönümü münasibətilə aprelin 24-də Qax rayon Heydər Əliyev Mərkəzində keçirilən “Nurlu ömrün böyük salnaməsi” mövzusunda elmi-praktik konfransda səsləndirilib.
Tədbir iştirakçıları əvvəlcə Mərkəzin foyesində görkəmli oftalmoloq-alimə həsr olunan sərgiyə baxıblar.
Tədbirin əvvəlində Dövlət Himni səsləndirilib, Ulu Öndər Heydər Əliyevin, akademik Zərifə Əliyevanın və şəhidlərin xatirəsi bir dəqiqəlik sükutla yad edilib.
Sonra akademik Zərifə Əliyevaya həsr edilən film nümayiş olunub.
Konfransda Qax Rayon İcra Hakimiyyəti başçısının müavini – Ərazi-təşkilat və ictimai-siyasi məsələlər şöbəsinin müdiri Vəfa Heydərova çıxış edərək, akademik Zərifə Əliyevanın mənalı ömür yolundan, tibb elminin, xüsusilə də onun oftalmologiya sahəsinin inkişafındakı xidmətlərindən danışıb. Qeyd olunub ki, akademik Zərifə Əliyevanın zəngin elmi irsi, oftalmologiyanın müxtəlif sahələri üzrə apardığı tədqiqatlar, qazandığı nailiyyətlər, yaratdığı fundamental əsərlər Azərbaycan tibb elminin parlaq səhifəsidir. Xalqımıza məxsus xeyirxahlıq, mərhəmətlilik kimi nəcib keyfiyyətləri, eləcə də müasirliyi və əməksevərliyi nurlu şəxsiyyətində cəmləyən bu nəcib qadının, qayğıkeş ananın, dəyərli alim və ictimai xadimin canlı və parlaq çöhrəsi bütöv bir dövrün, zamanın obrazı kimi qarşımızda durur. İşıqlı bir həyat yaşayan akademik Zərifə Əliyeva görkəmli oftalmoloq-alim, qayğıkeş həkim, eyni zamanda, gözəl ana və fədakar həyat yoldaşı kimi şərəfli bir ömür sürüb.
Konfransda YAP Qax rayon təşkilatının sədri Natiq Allahverdiyev, Şəki-Zaqatala Regional Mədəniyyət İdarəsinin Qax rayonu üzrə nümayəndəsi Dilarə Əzizova, həkim-oftalmoloq Aytac Hüseynzadə, şəhər 1 nömrəli tam orta məktəbin direktoru Nuranə Hacıyeva çıxış edərək, akademik Zərifə Əliyevanın keçdiyi şərəfli ömür yolundan, tibb elminin inkişafındakı xidmətlərindən, oftalmologiya sahəsinə gətirdiyi yeniliklərdən danışıblar.
Tədbir ədəbi-bədii, musiqili proqramla başa çatıb.
Müxbir – Mustafa Dadaşov
Bölmənin digər xəbərləri
