Qazaxıstan mətbuatında Folklor İnstitutu əməkdaşının kitabı haqqında məqalə dərc edilib
Bakı, 19 avqust, AZƏRTAC
Qazaxıstan mətbuatında AMEA Folklor İnstitutunun Türk xalqları folkloru şöbəsinin böyük elmi işçisi filologiya üzrə fəlsəfə doktoru Qumru Şəhriyarın “Edigey haqqında Qızıl Orda dastanı” kitabı barədə məqalə dərc edilib.
Folklor İnstitutundan AZƏRTAC-a bildirilib ki, Qumru Şəhriyar Qazaxıstan Elmlər Akademiyasının Muxtar Auezov adına Ədəbiyyat və İncəsənət İnstitutunun dəvətilə Almatı şəhərində səfərdə olub. Onun “Edigey haqqında Qızıl Orda dastanı” kitabının təqdimatı keçirilib. Qumru Şəhriyar həmin institutun təşkil etdiyi “Türk xalqlarının ortaq mirası - Edigey dastanı” adlı seminarda iştirak edib.
Bu barədə Qazaxıstanın “Almaty Aqshamy” qəzetində məqalə dərc olunub. Oljas Joldıbayın müəllifi olduğu “Elmi əməkdaşlığın artması” məqaləsində Qumru Şəhriyarın “Edigey haqqında Qızıl Orda dastanı” kitabının araya-ərsəyə gəlməsindən, kitabda toplanmış 47 variantdan, tərcümə zamanı ortaya çıxan problemlərdən, dastanın müəllif tərəfindən əldə edilən 80 variantından bəhs olunub.
Qeyd edək ki, Folklor İnstitutunun Elmi şurasının qərarı ilə çapdan çıxan kitabda dastanın dörd variantı - noqay, Kazan-tatar, teleut və Rumıniyada yaşayan türklər arasından toplanmış variantı tam şəkildə orijinaldan tərcümə edilib. Qırx üç variantın isə qısa məzmunu verilib. Dastanın söyləyicilərinə və tədqiqatçılarına da ayrıca bölmədə yer ayrılıb. Burada müxtəlif türk xalqlarında dastan söyləyən yıravlar və onların elm aləmində tanınmasında əvəzsiz xidmətləri olan tədqiqatçılar haqqında qısa məlumat verilib. Kitabın sonunda zəngin lüğət, geniş izahlar və şərhlər təqdim olunub. Mətnlərin hər birində variantlar haqqında qısa annotasiya verilib. Mətnlərin hansı mənbələrdən götürüldüyünü göstərməklə yanaşı, eyni zamanda, həmin mətn haqqında qısa arayış təqdim olunub.
Bölmənin digər xəbərləri
