Qazaxıstanın Ukraynadakı səfiri GUAM-ın baş katibini qəbul edib
Kiyev, 8 iyun, AZƏRTAC
Qazaxıstanın Ukraynadakı səfiri Samat Ordabayev Demokratiya və İqtisadi İnkişaf uğrunda Təşkilatın - GUAM-ın baş katibi Altay Əfəndiyevi qəbul edib.
Təşkilatın Kiyevdəki qərargahından AZƏRTAC-a bildirilib ki, baş katib səfiri GUAM-ın məqsəd və vəzifələri, cari ildə Azərbaycanın sədrliyi proqramının prioritetləri barədə məlumatlandırıb. Bu baxımdan Aİ-nin şərq sərhədlərini Orta Asiya ölkələri ilə əlaqələndirən nəqliyyat-tranzit dəhlizi konsepsiyasının həyata keçiriləməsi üzrə GUAM çərçivəsində əməkdaşlığın vacibliyi qeyd edilib. Vurğulanıb ki, bu dəhliz Transxəzər marşrutu ilə birlikdə Yeni İpək Yolunun mühüm tərkib hissəsi ola bilər. Baş katib qazax diplomatını bu istiqamətdə GUAM çərçivəsində son tədbirlər və qərarlar barədə də məlumatlandırıb.
Tərəflər Qara dəniz - Xəzər regionunda vəziyyət barədə fikir mübadiləsi aparıb, sabitliyin saxlanmasının və hərtərəfli əməkdaşlığın inkişafının vacibliyini vurğulayıblar.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
