“Qəbələ” klubunun prezidenti: Bəzi futbolçulardan cavab gözləyirik - AÇIQLAMA
Bakı, 16 iyul, AZƏRTAC
Güclənməli olan mövqeləri nəzərə alsaq, komandaya daha 4 və ya 5 legioner dəvət etməyi planlaşdırırıq.
Bu sözləri AZƏRTAC-a açıqlamasında “Qəbələ” klubunun prezidenti Fariz Nəcəfov yeni mövsümlə bağlı danışarkən deyib.
Funksioner bildirib ki, hazırda bəzi futbolçularla danışıqlar gedir: “Bəzi oyunçulardan cavab gözləyirik. Əvvəldən bildirdiyimiz kimi, akademiyamızın yetirmələri Premyer Liqada bizimlə olacaq. Buna görə də hələlik başqa yerli oyunçu dəvət etməyi düşünmürük”.
F. Nəcəfov bir sıra mövqelər üçün transferlərin vacib olduğunu vurğulayıb: “Müdafiənin sağ və sol mövqelərini çıxmaq şərti ilə digər zonalara transferlər etmək məcburiyyətindəyik”.
Qeyd edək ki, “Qəbələ” bunadək Prins Ovusu (son olaraq "Qəbələ"nin U-19 komandasında oynayıb), İsaak Amoah (son klubu “Atletiko Sanlukenyo”, İspaniya), Paulo Quimbila (son klubu "Əl-Əhli, Bəhreyn), Adriel Ba Louan (son klubu “Kan”, Fransa) ilə müqavilə imzalayıb.
Bölmənin digər xəbərləri
