Qəbələdə Beynəlxalq Pestisid sərgisi açılmışdır
Qəbələ, 7 sentyabr (AZƏRTAC). Ekologiya və Təbii Sərvətlər Nazirliyinin, Beynəlxalq Pestisid Assosiasiyasının təşkilatçılığı ilə Qəbələdə keçirilən XI Beynəlxalq Pestisid Forumu çərçivəsində beynəlxalq sərgi açılmışdır.
AZƏRTAC xəbər verir ki, 40-dan çox ölkənin təmsil olunduğu sərgidə Şərqi Avropa, Qafqaz və Mərkəzi Asiyada davamlı üzvi çirkləndiricilər haqqında məlumatlar öz əksini tapmışdır. Köhnəlmiş və davamlı üzvi çirkləndiricilərin vəziyyəti barədə məlumat verilir. Sərgidə nümayiş etdirilən kitab, jurnal və broşürlər vasitəsilə iki il əvvəl keçirilmiş beynəlxalq forumdan sonra həmin ölkələrdə görülmüş işlər, mövcud problemlər və gələcəkdə nəzərdə tutulan tədbirlər barədə məlumatlar diqqətə çatdırılır.
Sərgidə davamlı üzvi çirkləndiricilər - pestisidlərin inventarlaşdırılması, qablaşdırılması və saxlanılma poliqonları barədə şəkillər və videolar da nümayiş etdirilir. Sərgi iştirakçılarına məlumat verilmişdir ki, keçmişdə kənd təsərrüfatı sahəsində ziyanvericilərə qarşı kütləvi şəkildə istifadə olunmuş dərman preparatları insan sağlamlığına və ətraf mühitə ziyan vurmaqdadır. Mütəxəssislər tərəfindən sübut olunmuşdur ki, 12 adda xlor üzvi birləşmələrinin daxil olduğu pestisidlər - davamlı üzvi çirkləndiricilər xərçəng, qan-damar, sinir və digər xəstəliklərə səbəb olmuşdur.
Sərgi üç gün davam edəcəkdir.
######
Bölmənin digər xəbərləri
