QƏBƏLƏDƏ “BİOMÜXTƏLİFLİYƏ SƏRMAYƏLƏR VƏ YAŞIL TƏSƏRRÜFATA YARDIM” MÖVZUSUNDA BEYNƏLXALQ SEMİNAR KEÇİRİLİR
Qəbələ, 5 iyul (AZƏRTAC). İyulun 5-də Qəbələ şəhərindəki “Qafqaz Resorte” otelində Azərbaycan Respublikasının Ekologiya və Təbii Sərvətlər Nazirliyi və Birləşmiş Millətlər Təşkilatının Ətraf Mühit Proqramının birgə təşkilatçılığı ilə Biomüxtəliflik üzrə BMT Baş Məclisinin növbəti sessiyasına hazırlıq məqsədi ilə “Biomüxtəlifliyə sərmayələr və yaşıl təsərrüfata yardımın artırılması” mövzusunda ekspertlər səviyyəsində beynəlxalq seminar öz işinə başlamışdır.
Şərqi Avropa və Mərkəzi Asiya regionunun 30-a yaxın dövlətini təmsil edən ekspertlərin iştirak etdikləri tədbiri giriş sözü ilə açan ekologiya və təbii sərvətlər nazirinin müavini Firdovsi Əliyev son illər Azərbaycanda təbiətin mühafizəsi sahəsində mühüm işlər görüldüyünü bildirmişdir. Ətraf mühit sahəsində strateji proqramların müvəffəqiyyətlə icra olunduğu, bu tədbirlərin məntiqi davamı kimi Azərbaycanda 2010-cu ilin “Ekologiya ili” elan edildiyi diqqətə çatdırılmışdır.
Vurğulanmışdır ki, Azərbaycan Bioloji Müxtəliflik Konvensiyasının məqsədlərinə çatmaq istiqamətində mühüm addımlar atmış ölkələr siyahısına aid edilə bilər. Əgər 2002-ci ildə xüsusi mühafizə olunan təbiət əraziləri ölkə ərazisinin cəmi 4,5 faizini təşkil edirdisə, hazırda bu göstərici 10,1 faizə çatdırılmışdır. Son illər Azərbaycanda 8 milli park, 4 dövlət təbiət qoruğu, 6 yasaqlıq və 3 təbiət abidəsi yaradılmışdır. Əhalinin ekoloji cəhətdən təmiz içməli su ilə təminatının yaxşılaşdırılması məqsədi ilə respublikanın 12 rayonunun 122 kəndində modul tipli sutəmizləyici qurğular istifadəyə verilmiş, ümumilikdə 224 min insan Dünya Səhiyyə Təşkilatının standartlarına cavab verən içməli su ilə təmin edilmişdir. Bu ilin sonunadək daha 100-ə yaxın kənddə sutəmizləyici qurğuların inşası nəzərdə tutulur. Xəzər dənizinin çirklənmədən qorunması məqsədi ilə 2007-2010-cu illərdə gün ərzində 6140 kubmetr çirkab suyu təmizləmək gücünə malik 16 stansiya istismara verilmişdir. 2009-cu ilin payızı və 2010-cu ilin birinci rübündə ölkədə 8,2 milyon ədəd ağac və gül kolu əkilmişdir.
Seminarda BMT-nin Ətraf Mühit Proqramının Avropa üzrə proqram rəhbəri və ekosistemlərin idarə edilməsi alt proqramının əlaqələndiricisi İvonna Hiquore bildirmişdir ki, hazırda Şərqi Avropa və Qafqaz ölkələri mühafizə olunan əraziləri getdikcə artırırlar. Ekspert bioloji müxtəlifliyin qorunması üzrə vahid tədbirlər planının işlənib hazırlanmasının, bu sahəyə iri investisiyaların ayrılmasının vacibliyini vurğulamışdır.
İki gün davam edəcək tədbirin ilk günündə ekspertlərin iştirakı ilə Şərqi Avropa və Mərkəzi Asiya regionunda biomüxtəlifliyin qorunması və idarə edilməsi ilə bağlı müzakirələr aparılmış, regional və ölkə səviyyəli biomüxtəliflik məsələləri araşdırılmış, prioritet və Avropa Nazirlər Konfransına çıxarılacaq əsas məsələlər təhlil edilmişdir.
Qəbələdə, həmçinin beynəlxalq seminarla yanaşı, Avropa Nazirlər Konfransı çərçivəsində Biomüxtəliflik Konvensiyasının biomüxtəliflik zirvə toplantısı üzrə 10-cu Tərəflər Konfransına QHT-lərin hazırlıq görüşü də keçirilmişdir.
Bu tədbirlərin davamı olaraq iyulun 7-də Qəbələdə iştirakçı ölkələrin Nazirlər Konfransı baş tutacaq və bəyannamə imzalanacaqdır. Bəyannamənin qəbulunda 40-dan çox ölkənin nazir və nazir müavinləri ilə yanaşı, BMT-nin Ətraf Mühit üzrə Avropa Bürosunun direktoru Kristof Buvye də iştirak edəcəkdir.
Qəbul olunacaq bəyannamə iştirakçı ölkələrdə bioloji müxtəlifliyin qorunması ilə bağlı görüləcək işlərə böyük təkan verəcəkdir.
Bölmənin digər xəbərləri
