Qəbələdə XI Beynəlxalq pestisidlər forumu davam edir
Qəbələ, 8 sentyabr (AZƏRTAC). Qəbələdə Azərbaycanın Ekologiya və Təbii Sərvətlər Nazirliyinin və Beynəlxalq Pestisid Assosiasiyasının təşkilatçılığı ilə XI Beynəlxalq pestisid forumu davam edir.
AZƏRTAC xəbər verir ki, tədbirin ikinci günündə ekspertlər Moldovada köhnəlmiş pestisidlərin ləğv edilməsi, son 10 ildə Sloveniyada çox istifadə edilən və köhnəlmiş pestisidlərin idarə olunması, Belarusda köhnəlmiş pestisidlər, reyestr, monitorinq və ətraf mühitə təsirin qiymətləndirilməsi, Ukraynada vaxtı keçmiş davamlı üzvi çirkləndiricilərin vəziyyəti barədə məlumat vermişlər. Həmçinin Kaluş bölgəsində fövqəladə ekoloji vəziyyətin əvvəlki statusu, Özbəkistanda pestisidlərin texniki öyrənilməsi layihəsinin nəticələri və Stokholm Konvensiyasının ratifikasiya olunması məsələsi, Qazaxıstanda Qlobal Ekologiya Fondunun köhnəlmiş pestisidlərlə bağlı həyata keçirdiyi layihənin nəticələri, Qırğızıstanda və Tacikistanın Xatlon regionunda köhnəlmiş pestisidlər barədə söhbət açılmışdır.
Daha sonra keçirilmiş sessiyalarda Almaniyanın davamlı üzvi çirkləndiricilər üzrə ekoloji, Böyük Britaniyanın ictimai maraq üzrə məsləhət şirkətlərinin, ABŞ-ın Minnesota Çirklənməyə Nəzarət Agentliyinin, Cambridge ekoloji məsləhət xidməti şirkətinin, Rumıniyanın Elmlər və Mühəndislik İnstitutunun mütəxəssisləri çıxış etmişlər. Onlar davamlı və köhnəlmiş üzvi çirkləndiricilər-pestisidlərin idarə edilməsi, inventarlaşdırılması, qablaşdırılması və saxlanılma poliqonları, pestisid ərazilərinin qiymətləndirilməsi üzrə alətlər, polixlorbifenillərin davamlı ekoloji idarə edilməsi üzrə beynəlxalq təcrübə, ictimaiyyətin məlumatlandırılması, ictimai iştirak və ictimai sağlamlıq, tullantı sularını təmizləyən zavodlar, ətraf mühitin çirklənməsinin monitorinqi, təmiz suyun çirklənməsi məsələləri üzrə müzakirələr aparmış, təqdimatlar etmişlər.
Sessiyada Azərbaycanda davamlı üzvi çirkləndiricilərlə bağlı ümumi vəziyyət, pestisidlərin inventarlaşdırılması və idarə olunması, zərərli dioksinlərin müəyyən edilməsi, Kür çayında baş verən daşqınların ətraf mühitə, xüsusilə də bu yolla yayılan pestisidlərin torpaqlara təsiri, əhalinin maarifləndirilməsində QHT-lərin rolu barədə məlumat verilmişdir.
Moldovanın ətraf mühit naziri George Şalarunun sədrliyi ilə İsveç və Şərqi Avropa, Qafqaz və Mərkəzi Asiya proqramı tərəfindən dəstəklənən “Azərbaycanda ictimaiyyətin məlumatlandırılması və inventarlaşdırma üzrə pilot layihə”, ərazilərdə tanınmayan maddələrin müəyyən olunması problemləri, çirklənmiş torpaqlar mövzusunda müzakirələr aparılmışdır.
Müzakirələrdən sonra Jan Van Den Berginin pestisidlərlə əlaqədar ekranlaşdırdığı “Sakit qar” filmi nümayiş etdirilmişdir.
Forumun gedişində pestisidlərin davamlı idarə olunması üzrə müxtəlif təkliflər irəli sürülmüş, təhlillər aparılmış, ölkələrdə görülmüş işlər, mövcud problemlər və gələcəkdə nəzərdə tutulan tədbirlər barədə məlumatlar diqqətə çatdırılmışdır.
Kənd Təsərrüfatı Nazirliyinin, Niderland Krallığının, Davamlı Üzvi Çirkləndiricilərə dair Mərkəzi və Şərqi Avropa Regional Mərkəzinin (RECETOX), Çexiyanın Brno şəhərinin Masarik Universitetinin, Almaniyanın Federal Ətraf Mühit Agentliyinin (UBA) dəstəyi ilə keçirilən forumda 40-dan çox ölkəni təmsil edən 120-dən artıq ekspert iştirak edir.
Sentyabrın 9-da başa çatacaq XI Beynəlxalq pestisidlər forumu ölkələr, ekspertlər, təşkilatlar və donorlar arasında daha geniş informasiya mübadiləsi və mümkün əməkdaşlığın yaradılması məqsədilə hökumətləri, donorları, BMT agentliklərini, hökumətlərarası təşkilatları, QHT-ləri, elmi müəssisələri və özəl sektoru bir araya gətirmişdir.
Bölmənin digər xəbərləri
