“Qəlbinin sazı”na köklənən şair
Bakı, 21 may, AZƏRTAC
Hər zaman dövrün, zamanın nəbzini tutmaq iqtidarında olan Mövlud Teymurun poeziyasından müharibənin qoxusu, zamanın dəhşətləri, ictimai-siyasi mühitin diktəsi və münasibətlər, şairi düşündürən iztirablar aşılanır və birmənalı olaraq təqdim edilir. Bir neçə onilliklərdir ki, bu aləmdə sirli-soraqlı dünya ilə bağlı fəlsəfi düşüncələrini bizlərlə bölüşür və cəmiyyəti düşündürən məsələləri nəzmə çəkdiyi misraları ilə diqqətə çatdırır. Ruhu gənc, qələmi iti, təfəkkürü aydın və sağlam olan şairin misralarına hakim olan sənət meyarı onu özünün sezmədiyi halda belə 70 yaşın tamamına gətirib çıxardıb. Yetmiş ilin sazağını, istisini, nəşəsini, sevinc və qüssəsini yaşayan şair bir ömür yolundan müəmmalı soraqlarla bu günə gəlib çıxıb. Yaşın ölçüsü yaşanılan illərlə, qəlbin hərarəti ilə ölçüldüyündən, zəngin təəssüratlarla kamilliklə gəncliyin bir ortaq nöqtəsində yaşayır. Onun yeni “Qəlbimin sazı” kitabında toplanan şeirləri də keçdiyi yola bir baxış, yaşanılmış illərin hesabatı, bir sözlə sözlə-zamanın vəhdəti kimi yozula bilər. Şairin “Təknur” nəşriyyatı tərəfindən nəfis tərtibatla çapdan çıxan “Qəlbimin sazı” kitabının da əsasını məhz ali hisslər, vətənə, torpağa olan məhəbbət, bu torpağın sirli-soraqlı məkanlarının vəsfi, böyük şəxsiyyətlərə, simalara olan sevgi və s. təşkil edir.
AZƏRTAC xəbər verir ki, bütün bunlarla yanaşı, qardaş, dost ölkə Türkiyəyə, türk xalqına səmimi qardaşlıq, dostluq etirafları da şairin nəzmə çəkdiyi misralarda öz əksini tapıb. Əlbəttə ki, kitabı vərəqlədikcə bu misraların insan ömrünün ən yaddaqalan və unudulmaz səhifələrindən, vətənə olan müqəddəs hisslərdən yoğrulduğunu görürük. Nəzmə çəkdiyi misralarda dövrün ruhunu, ahəngini duyan qələm sahibinin cəmiyyətdə cərəyan edən hadisələrə olan münasibətilə tanış oluruq.
“Yaşa, Heydər qurub - yaradan vətən” şeirində M.Teymur ulu öndər Heydər Əliyevin “Vətəndə asayiş, yenilik etdi, İnkişaf, yüksəliş dirilik etdi”, - deyərək ölkəmizin bugünkü yüksəlişinə, uğurlarına nəzər salır. “Vətən birdir” şeirində “Harada olsam vətən deyə qəlb dinir” deyərək ürəklərdə, duyğularda bəslənən, nəğmə kimi səslən vətənin müqəddəsliyindən söz açır.
Müxtəlif mövzularda yazıb-yaradan və hər zaman vətənin, Azərbaycanın adını yüksəkdə tutan şairin söz dünyası sevgi ilə yoğrulmuşdur. “Bir nəğmə var”, “Odlar diyarı”, “Azərbaycan dünyamız”, “And yeri” kimi şeirlərində vətənlə sevinən, vətənlə gülən şairin fikir yükünün əsasında vətənə xidmət, vətən borcu, vətən sevgisi dayanır. Vətən anlamı dünyanın hansı nöqtəsində insanın yaşamasından asılı olmayaraq, məhz onun üçün ən əziz və əvəzsiz bir məkandır. Bu anlayışın arxasında insanın mənliyi, qüruru, kimliyi, kökü, şəcərəsi dayanır.
“Türk”, “Türk oğlu”, “Azər oğlu”, “Türkün bayrağı” kimi şeirlərində türk dünyasına olan sonsuz sevgisi nəzmə çəkilən misralardan açıq-aydın sezilir. “Türk qardaşlarım” şeirində bir-birində dost, sirdaş olan ölkələrin ayrılmaz olduğunu poetik dillə ifadə edib.
Kitabda şairin Azərbaycanın tanınmış sənətkarlarına həsr etdiyi şeirlər də daxil edilib. Azərbaycan ədəbiyyatının seçilib-sevilən, öz möhürünü vurmuş simaları Xalq yazıçısı Anara həsr etdiyi “Yazarların naxışı”, Rəsul Rzaya həsr etdiyi “Rəsul böyük sənətkardı” və digər simalara həsr etdiyi şeirlərində böyük sənətkarlara olan tükənməz sevgisini ifadə edir.
Onun şeirlərinin mayasında, qayəsində səmimiyyət, düzlük-halallıq dayanır. Bəlkə də bu səbəbdəndir ki, onun yazdıqları hər kəsin qəlbinə yol tapır, ürəyini ovsunlayır. Dünən olduğu kimi, bu gün də və qarşıdakı ömür möhlətində də o, hər zaman “Qəlbinin sazı”nı kökləyəcək və neçə-neçə gözəl şeirlərlə oxucuların görüşünə gələcək.
Bölmənin digər xəbərləri
