Qeyri-infeksion xəstəliklərin profilaktikası üzrə maarifləndirici kampaniya keçirilir
Bakı, 20 aprel, AZƏRTAC
Ümumdünya Arterial Hipertoniya ilə Mübarizə Günü və qeyri-infeksion xəstəliklərin profilaktikası üzrə Azərbaycanda keçirilən maarifləndirici kampaniya ilə bağlı Səhiyyə Nazirliyi İctimai Səhiyyə və İslahatlar Mərkəzində (İSİM) mətbuat konfransı keçirilib.
AZƏRTAC xəbər verir ki, konfransda İSİM-in direktoru Qəhrəman Haqverdiyev qeyri-infeksion xəstəliklərlə mübarizənin müasir dövrdə həm dünya miqyasında, həm də ayrı-ayrı ölkələr səviyyəsində səhiyyə sistemlərinin prioritet vəzifələrində əsas yer tutduğunu deyib: “Qeyri-infeksion xəstəlikləri yaradan əsas səbəblər isə zərərli vərdişlərdir - tütünçəkmə, spirtli içkilərdən sui-istifadə, qeyri-sağlam qidalanma və fiziki passivlikdir. Odur ki, səhiyyə işçiləri, ictimai səhiyyə mütəxəssisləri tərəfindən əhali arasında daim təşviqat aparılır, insanlara zərərli vərdişlərdən uzaq olmaq, öz sağlamlıqlarına məsuliyyətlə yanaşmaq təbliğ olunur”.
İSİM-in Səhiyyə siyasəti və planlaşdırma şöbəsinin müdiri Nabil Seyidov vurğulayıb ki, qeyri-infeksion xəstəliklər müasir dövrün, cəmiyyətin problemidir: “Bu xəstəliklərə qarşı mübarizədə səhiyyə sisteminin tədbirləri və tibbi xidmətlərin gücləndirilməsi ilə yanaşı, eyni zamanda əhalinin maarifləndirilməsi həyata keçirilməlidir. Bu kampaniyanın da əsas məqsədi insanlara tövsiyə etməkdir ki, həyat tərzlərini dəyişsinlər, qan təzyiqinə, qanda şəkərin səviyyəsinə nəzarət etsinlər”.
Tibbi Ərazi Bölmələrini İdarəetmə Birliyinin (TƏBİB) Ümumi profilli tibbi yardımın təşkili şöbəsinin müdiri Kəmalə Ağayeva müxtəlif qurumların birgə əməkdaşlığı ilə təşkil olunan bu maarifləndirici kampaniyanın vacib addım olduğunu bildirib: “Burada əsas məqsəd əhalini arterial hipertenziya xəstəliyi və bu xəstəliyin mümkün ağırlaşmaları haqqında maarifləndirmək, qan təzyiqinin ölçülməsinin əhəmiyyətini vurğulamaqdır”.
Azərbaycan Kardiologiya Cəmiyyətinin (AKC) sədri Üzeyir Rəhimov son illərdə bütün ölkələrdə və o cümlədən Azərbaycanda ən çox xəstələnmə, ölüm və əlilliklə nəticələnən xəstəliklər sırasında məhz qeyri-infeksion xəstəliklərin yer aldığını təəssüflə vurğulayıb: “Amma bu xəstəliklərin qarşısını almaq mümkündür. Qeyri-infeksion xəstəliklərin inkişafına təsir göstərən risk amillərini aradan qaldırmaqla və sağlam davranışı formalaşdırmaqla onların yükünü azaltmaq olar”.
“Servye Azərbaycan” şirkətinin direktoru Rişad Təhməzov arterial hiprertenziyanın bütün dünyada olduğu kimi, Azərbaycanda da geniş yayıldığını bildirib: “Baxmayaraq ki, yüksək qan təzyiqi ölüm riskləri arasında ən birincidir, bu problemə hələ də əhali tərəfindən lazımi diqqət yetirilmir. Məhz bu məqsədlə Beynəlxalq Hipertenziya Cəmiyyəti tərəfindən təşəbbüs irəli sürüldü və “Çünki belə lazımdır” şüarı ilə dünya ölkələrində təbliğat kampaniyasına başlanıldı”.
Sonda kütləvi informasiya vasitələri nümayəndələrinin sualları cavablandırılıb və iştirakçılara qeyri-infeksion xəstəliklərin profilaktikası istiqamətində İSİM tərəfindən hazırlanaraq çap edilən maarifləndirici materiallar paylanılıb.
Qeyd edilib ki, ötən il də keçirilən bu maarifləndirici kampaniya bu dəfə İSİM, TƏBİB, İTV, “Bakı Metropoliteni” QSC, AKC və “Servye Azərbaycan” şirkətinin birgə əməkdaşlığı ilə təşkil olunacaq və kampaniya çərçivəsində digər qurumların da əməkdaşlığa qoşulması gözlənilir.
Bölmənin digər xəbərləri
