QIRĞIZISTANDA ÖLÜM CƏZASI LƏĞV EDİLMİŞDİR

29.03.2004 [11:04]
Çap et
A⁺ A^-

AZƏRTAC-ın Bişkekdən aldığı xəbərə görə, Qırğızıstan Prezidenti Əsgər Akayev ölkənin Cinayət Məcəlləsində dəyişikliklər edilməsi haqqında qanun imzalamışdır.

Yeni qanun dövlət xadiminin və ya ictimai xadimin, məhkəmə sistemi, yaxud hüquq mühafizə orqanları nümayəndələrinin həyatına qəsd məqsədi ilə törədilmiş cinayətə görə ölüm cəzasının ləğv edilməsini nəzərdə tutur.

Bu cür dəyişikliklər Qırğızıstanın “cinayətə görə cəzanın liberallaşdırılmasına” yönəldilən ümumi xəttinin davamı olmaqla yanaşı, “insan hüquqlarının müdafiəsi sahəsində beynəlxalq standartlara müvafiq surətdə” ölüm cəzasının tədricən ömürlük həbs cəzası ilə əvəz etmək məqsədi daşıyır.

Qırğızıstanda Prezidentin fərmanları əsasında, 1998-ci ildə ölüm cəzası üçün elan olunmuş moratorium davam edir.