QIRMIZI DƏNİZLƏ ÖLÜ DƏNİZ ARASINDA KANAL ÇƏKİLƏN BARƏDƏ
İordaniya və İsrail Qırmızı dənizlə Ölü dəniz arasında kanal çəkmək barədə razılığa gəlmişlər. Bu böyük layihənin dəyəri 800 milyon dollar təşkil edəcəkdir. Kanalı çəkməkdən məqsəd Ölü dənizin duzluluğunu azaltmaqdır. Dənizin suyunun həddindən artıq duzlu olması bu nadir təbii qoruğu tədricən məhv edir. Kanalın uzunluğu 320 kilometr olacaqdır.
İordaniya və İsrail bu bahalı tikintinin maliyyələşdirilməsində Dünya Bankının köməyinə ümid bəsləyir.
Son illər regionda daim quraqlıq olduğundan və İordan çayının suyundan suvarma məqsədi ilə getdikcə daha çox istifadə edildiyindən Ölü dənizdə suyun səviyyəsi sürətlə aşağı düşür. İordan çayı dünyanın bu ən duzlu dənizinə axan yeganə çaydır. Ekoloqlar xəbərdarlıq edirlər ki, heç bir axarı olmayan Ölü dənizdən 2050-ci ilədək yalnız xatirə qalacaqdır. Layihədə iştirak etmək Misirə də təklif olunmuşdur. Lakin Qahirə bu tikintidə İsraillə birgə iştirak etmək ideyasını rədd etmişdir. Misirin ətraf mühitin mühafizəsi üzrə dövlət naziri Mamdux Riad Yohannesburqda sabit inkişaf üzrə ümumdünya sammitində bəyan etmişdir ki, onun ölkəsi diplomatik əlaqələr istisna olmaqla, İsraillə bütün əlaqələri dondurmaq qərarındadır.
İTAR-TASS-ın verdiyi xəbərə görə, digər ərəb ölkələri də “əsrin tikintisi”nə etiraz edirlər. Onlar xatırladırlar ki, Ərəb Dövlətləri Cəmiyyətinin Yaxın Şərqdə ədalətli sülh əldə olunmayınca İsraillə hər bir əməkdaşlığın dayandırılmasını nəzərdə tutan qərarları mövcuddur.
Bölmənin digər xəbərləri
