Qırx dörd günlük müharibədə Azərbaycan gəncliyi vətənpərvərliyini, əzmini bütün dünyaya nümayiş etdirdi
Ağcabədi, 20 mart, AZƏRTAC
Azərbaycanda həyata keçirilən gənclər siyasəti gənc nəslin inkişafı, bilik və bacarıqlarını realizə etmələri üçün şərait yaratmaqla yanaşı, həm də onları vətənpərvər ruhda formalaşdırıb. Odur ki, 44 günlük Vətən müharibəsində Azərbaycan gəncliyi vətənpərvərliyini, əzmini bütün dünyaya nümayiş etdirdi.
AZƏRTAC-ın bölgə müxbiri xəbər verir ki, bu fikir Ağcabədi rayon Heydər Əliyev Mərkəzində “44 günlük haqq savaşımızda gənclərimizin rolu” mövzusunda keçirilən tədbirdə səsləndirilib.
Tədbir iştirakçıları əvvəlcə Azərbaycanın ərazi bütövlüyü uğrunda canını fəda edən Vətən müharibəsi qəhrəmanlarının xatirəsini bir dəqiqəlik sükutla yad ediblər.
Mərkəzin direktoru səlahiyyətlərini icra edən Rövşanə Əliyeva tədbir iştirakçılarını zəfər qoxulu Novruz bayramı münasibətilə təbrik edib, gənclərimizin 44 günlük müharibədəki fədakarlıqlarından söhbət açıb. Bildirib ki, Azərbaycan polietnik dövlət kimi ərazisində yaşayan bütün xalqların vətənidir. Dünyəvi və demokratik dövlət modelini qəbul edən respublikamızda insanların dini inancları, habelə vicdan azadlığı yüksək səviyyədə təmin olunur. Eyni zamanda, etnik-dini mənsubiyyətindən asılı olmayaraq, ölkənin hər bir vətəndaşının torpaqlarımız üçün sahiblik və məsuliyyət hissi ilə yaşaması milli və vətəndaş həmrəyliyinin göstəricisidir. Biz ötən il sentyabrın 27-dən noyabrın 10-dək davam edən 44 günlük Vətən müharibəsində bu güclü həmrəyliyin, yenilməz ruhun bir daha şahidi olduq.
“Aran” qəzetinin baş redaktoru Məhsəti Ağayeva, Ağcabədi Mədəniyyət Mərkəzinin əməkdaşı Gündüz Nəcəfov, Mərkəzləşdirilmiş Kitabxana Sisteminin direktoru Məhəbbət Əliyeva, Gənclərin İnkişaf və Karyera Mərkəzinin Ağcabədi nümayəndəliyinin əməkdaşı Mirəli Mirəliyev və başqaları çıxış edərək 44 günlük müharibədə gənclərimizin qəhrəmanlığından, xalqımızın birliyindən danışıblar. Bildirilib ki, torpaqlarımızın azadlığı, ərazi bütövlüyümüzün bərpası ilə nəticələnən Vətən müharibəsi Azərbaycan xalqının milli həmrəyliyinin, monolit birliyinin təntənəsi oldu. Vəzifəsindən, sosial statusundan, milli-etnik və dini mənsubiyyətindən asılı olmayaraq böyükdən kiçiyə qədər hər bir vətəndaş bu müqəddəs savaşda Prezident İlham Əliyevin ətrafında səfərbər oldu, qələbəmizə töhfəsini verdi. Müharibənin əsas ağırlığı isə Azərbaycan gəncinin üzərinə düşdü. Çünki amansız döyüşlərdə əldə silah düşmənin üzərinə gedən ilk gənclər oldular.
Bölmənin digər xəbərləri
